2026 jylǵy 25 tamyzdan bastap Qazaqstanda alımentterdi aýdarýdyń jańa tártibi kúshine enedi. Atqarý qujattary boıynsha qarajat tek arnaıy banktik shottarǵa túsetin bolady, dep habarlaıdy infohub.kz saıty.
Ózgerister 2026 jylǵy 24 maýsymdaǵy №325-VIII Zańda qarastyrylǵan. Bul zań atqarýshylyq is júrgizý týraly zańnamaǵa ózgerister engizedi. Qujat jańa 102-1-bappen tolyqtyryldy.
Jańa erejelerge sáıkes, alıment alýshy arnaıy banktik shot ashyp, onyń derektemelerin sot oryndaýshysyna tapsyrýy tıis. Óndirilgen qarajat tek osyndaı shotqa aýdarylady.
Ádilet mınıstrliginiń túsindirýinshe, jańashyldyqtyń basty maqsaty – balalar men eńbekke jaramsyz adamdardy asyraýǵa arnalǵan aqshany qorǵaý. Arnaıy alımenttik shottaǵy qarajatqa tyıym salýǵa bolmaıdy. Bul alımentterdiń tek maqsatty túrde jumsalýyna jáne alýshynyń basqa qaryzdaryna baılanysty zardap shekpeýine kepildik beredi.
Arnaıy shot ashý úshin alıment alýshy bankke jeke kýáligin, shottyń maqsatyn kórsetetin ótinishin, sondaı-aq alıment óndirip alý týraly sot aktisiniń kóshirmesin nemese olardy tóleý týraly notarıaldy kýálandyrylǵan kelisimdi usynýy qajet. Bank mundaı shotty tólemderdiń maqsatyn kórsete otyryp, arnaıy dep belgileıdi.
Arnaıy shottyń bolmaýy tóleýshini alıment tóleý mindetinen bosatpaıdy. Alaıda óndirip alýshy shot ashyp, onyń derektemelerin bermeıinshe, óndirilgen aqshany aýdarý múmkin bolmaıdy.
Bul jaǵdaıda sot oryndaýshysy alýshyǵa shot ashý qajettigi týraly habarlaýǵa mindetti. Derektemeler usynylǵannan keıin qarajat belgilengen tártippen aýdarylady, al alıment boıynsha bereshek eseptele beredi jáne esepten shyǵarylmaıdy.
Ádilet mınıstrliginiń baǵalaýynsha, jańa normalar alıment alýshylardyń qorǵanysyn kúsheıtip, atqarýshylyq is júrgizýdiń tıimdiligin arttyryp, balalar men eńbekke jaramsyz azamattardy asyraýǵa arnalǵan qarajattyń saqtalýyn qamtamasyz etýi tıis.