KSRO halyq ártisi Alla Pýgachóva sahnaǵa qaıta oralý múmkindigin joqqa shyǵarmady. Ánshi án aıtýǵa, shyǵarmashylyq keshter ótkizýge daıyn, biraq ázirge bul úshin qolaıly sát týǵanyn sezbeıdi, dep infohub.kz saıty habarlaıdy.
77 jastaǵy ártis Laima Rendezvous Jūrmala 2026 festıvalinde Maksım Galkınmen birge kóringen. Áńgimelesýdiń jazbasyn latvıalyq LSM4 mýltımedıalyq jobasy jarıalady. «Qudaıym-aı. Negizi, men án aıtýǵa da, áńgimeleýge de, bárine daıynmyn. Biraq ázirge jan-dúnıem men ýaqyttyń sondaı kúıin kórip turǵan joqpyn. Sony sezisimen, shyǵamyn. 90-da da shyǵa alamyn. Jaqsy bolar edi», — dep keltiredi basylym Pýgachóvanyń sózin.
Ýkraınalyq jýrnalısermen áńgimesinde ánshi Kıevke shaqyrsa, barýǵa daıyn ekenin aıtty. Bul týraly ÝNIAN basylymy habarlady. «Sizder bilesizder, biz sizderdi qoldaımyz... Tezirek sol jaqta. Shaqyryńyzdar — birge án aıtamyz. Tek beıbit aspan astynda ǵana, ótinemin», — dedi ártis.
Pýgachóva taıaqpen kórinýiniń sebebin de túsindirdi. Ol qulaǵannan keıin aýyr jaraqat alyp, tórt aı boıy qozǵala almaı qalǵan: aıaǵy men jambas býynyn syndyrǵan. «Bul beıne emes. Eshkimge eshteńe aıtpadym. Men tórt aı qozǵalmaı jattym. Sebebi quladym. Qysqasy, aıaǵymdy jáne jambas býynymdy syndyrdym. Shynyn aıtsam, múlde turamyn dep oılamadym. Panıkalyq shabýyldar boldy, óte jaman boldy», — dedi Pýgachóva.
Ánshi qalpyna kelý jalǵasyp jatqanyn aıtty. Dárigerler onyń alty aıǵa deıin qozǵalmaı qalýy múmkin ekenin eskertken, biraq ártis aýyrsynýdy jeńip, birtindep qalypty ómirge orala bastaǵan. Reseıden tys ómir týraly aıta kele, Pýgachóva ózi úshin eń basty qoldaý kózi otbasy ekenin atap ótti: «Maǵan bári jetkilikti. Reseıde de, munda da, kez kelgen jerde de. Óıtkeni biz birgemiz. Otbasy. Otbasy qaıda bolsa, bári sonda, túsinesiz be? Otbasynda bári jaqsy bolsa, sen kez kelgen elde, kez kelgen jaǵdaıda, qarjylyq nemese moraldyq, árqashan kúsh tabasyń».