АҚШ аллергологтары балаларда ауыр анафилаксияның үш жағдайын тіркеді. Олардың себебі — энергетикалық сусындағы балық коллагені, суық сығымдалған кастор майы және сквиш ойыншықтары, деп хабарлайды infohub.kz сайты.
News Medical медициналық порталының жазуынша, күнделікті өнімдер, косметика мен ойыншықтардың құрамындағы байқалмайтын компоненттер балалар мен жасөспірімдерде шұғыл адреналин енгізуді талап ететін ауыр анафилаксия тудыруы мүмкін. Үш клиникалық жағдайды дәрігерлер 2026 жылы Американдық аллергия, астма және иммунология колледжінің (ACAAI) жыл сайынғы ғылыми конференциясында ұсынды.
Бірінші жағдай астма мен экземамен ауыратын 15 жастағы жасөспіріммен болды: жаңа энергетикті ішкеннен кейін бірнеше минут өтпей оның денесінде есекжем пайда болып, тынысы тарылды. Аллерголог Аннабель Роуленд сусынның құрамында трескадан алынған 5 грамм коллаген болғанын анықтады. Ал балыққа жасалған стандартты тері сынамалары теріс нәтиже берді, себебі сынақ материалдарында бұл ақуыздың мөлшері аз болған.
Екінші оқиғаны дәрігер Кеюн Ван сипаттады: экземамен ауыратын 10 жастағы қыз басының терісіне суық сығымдалған кастор майын жаққаннан кейін алғаш рет анафилаксияға ұшырады. Бұл майдың рафинадталған түрінен өзгешелігі — құрамында клещевина ақуыздары сақталған.
Үшінші есепті аллерголог Меган Марте дайындады: 11 жастағы қыз әртүрлі сквиштермен ойнағаннан кейін бір апта ішінде екі рет тамағы ісіп, тынысы қиындаған күйде жансақтау бөліміне түсті. Қан талдауы оның резеңке антистресс ойыншықтардың құрамында болуы мүмкін латекске сезімталдығын анықтады.
Дәрігерлер ата-аналар мен медицина қызметкерлерін аллергияның себебі түсініксіз ұстамалары кезінде жасырын ингредиенттерді мұқият зерттеуге шақырады.