Almatyda Mercedes-pen soqtyǵysýdan aman qalǵan Suzuki kóliginiń jolaýshysynyń jaǵdaıyn dárigerler aıtty, dep habarlaıdy infohub.kz.
Almaty qoǵamdyq densaýlyq saqtaý basqarmasynyń málimetinshe, 27 shildede saǵat 04:05-te №7 qalalyq klınıkalyq aýrýhanaǵa 1991 jyly týǵan áıel jetkizilgen. Ol Rysqulov kóshesinde bolǵan jol-kólik oqıǵasynda zardap shekken. Áıel kólikte jolaýshy bolǵan.
Zardap shekken áıelge polıtravma, onyń ishinde birneshe synyqtar men jumsaq tinderdiń jaraqattary dıagnozy qoıylǵan. Qajetti shuǵyl emdik-dıagnostıkalyq sharalar júrgizilip, synyqtar bekitilgen. Qazir naýqas reanımasıa bóliminde aýyr halde jatyr.
Eske salaıyq, qaıǵyly oqıǵa ótken túni Almatynyń Alataý aýdanynda bolǵan. Jol apaty saldarynan Suzuki kóliginiń júrgizýshisi men onyń bir jolaýshysy oqıǵa ornynda qaza tapqan. Suzuki-diń taǵy bir jolaýshysy men Mercedes júrgizýshisi jaraqattarymen aýrýhanaǵa jetkizilgen.