Jańa oqý jyly qarsańynda Almaty bıligi jol jaǵdaıyna, qoǵamdyq kólik jumysyna jáne mektep mańyndaǵy qaýipsizdikke baqylaýdy kúsheıtpek, dep habarlaıdy infohub.kz saıty.

Almaty ákimi Darhan Satybaldy qalanyń oqý jylyna daıyndyǵyna arnalǵan keńeıtilgen aparattyq keńes ótkizdi. Negizgi nazar kólik jaǵdaıyna, balalar qaýipsizdigine jáne jol qurylysy jumystarynyń barysyna aýdaryldy.

Qala basshysy jaýapty qyzmetterge kúsheıtilgen jumys rejımine kóshýdi tapsyrdy. Qyrkúıektiń alǵashqy kúnderinde qoǵamdyq kóliktiń turaqty jumysyn qamtamasyz etý, keptelisterge jedel den qoıý jáne joldardyń negizsiz jabylýyna jol bermeý qajet.

Mektep mańyndaǵy ýchaskelerge erekshe nazar aýdarylady. Satybaldy jol jaǵdaıyn baqylaýdy kúsheıtip, eń kóp júktelgen ýchaskelerde qosymsha sharalar qabyldaýdy tapsyrdy.

Tıisti basqarmalar, aýdandyq ákimdikter jáne polısıa departamenti joldardaǵy ahýaldy únemi baqylap, qaladaǵy jaǵdaıdy eskere otyryp, jedel sheshimder qabyldaýy tıis.

Buǵan deıin Almatyda oqý jylynyń basynda qoǵamdyq kólik jumysy kúsheıtiletini habarlanǵan bolatyn. Qyrkúıektiń alǵashqy eki aptasynda qosymsha 500-ge jýyq avtobýs marshrýtqa shyǵady, al metro poıyzdarynyń sany 11-den 13-ke deıin artady. Mektep oqýshylaryn tasymaldaýǵa 300 avtobýs jumyldyrylady, olar 60 mektepke jáne 13 myńnan astam balaǵa qyzmet kórsetedi. 1-5 qyrkúıek aralyǵynda ákimdik qyzmetkerleriniń bir bóligi qashyqtan jumys isteýge kóshedi, iri kompanıalarǵa da qashyqtan jumys nemese ıkemdi jumys kestesin qarastyrý usynyldy.

Sonymen qatar, Almaty polısıasy qala turǵyndaryn 1 qyrkúıekte jeke kólikterinen múmkindiginshe bas tartýdy suraǵan bolatyn. Oqý jylynyń alǵashqy kúnderinde tártipti qamtamasyz etýge 700-ge jýyq polıseı jáne 130-dan astam patrúldik ekıpaj jumyldyrylady, al mektep mańynda stasıonarlyq beketter men mobıldi patrúlder jumys isteıtin bolady.

2026-2027 oqý jylynda Qazaqstanda 8 048 mektep jumys isteıdi, al oqýshylar sany 4,1 mıllıonnan asady, onyń ishinde 380 myńnan astam birinshi synyp oqýshysy bar. Qańtar-shilde aılarynda elimizde 18 090 oryndyq 32 jańa mektep paıdalanýǵa berildi.