Almaty qalasy men Almaty oblysyndaǵy 29 turǵyn úı kesheni jınaqtalǵan qaryzdaryna baılanysty elektr qýatynsyz qalý qaýpi bar. 2026 jylǵy 1 maýsymdaǵy jaǵdaı boıynsha tutynýshylardyń elektr energıasy boıynsha bereshegi 34 mlrd teńgege jetti, bul óńirdiń energetıkalyq júıesine eleýli táýekelder týǵyzady, dep habarlaıdy infohub.kz saıty.

«Alataý Jaryq Kompanıasy» AQ fılıaly — «Energosbytta» túsindirgendeı, bereshektiń munshalyqty kólemi elektr energıasy, ony berý jáne qajetti qýatty qamtamasyz etý boıynsha ýaqtyly esep aıyrysýǵa kedergi keltiredi. Osyǵan baılanysty kompanıa kúzgi-qysqy kezeń aıaqtalǵannan keıin 8 maýsymnan bastap merzimi ótken bereshegi bar tutynýshylarǵa elektrmen jabdyqtaýdy shekteı bastady. Bul rette ajyratý aldynda tutynýshylar aldyn ala habardar etilýi tıis.

Kompanıada elektr energıasyn paıdalaný qaǵıdalarynyń normasyn eske saldy: «Energıa berýshi uıym energıamen jabdyqtaýshy uıymnyń ótinimi boıynsha tutynýshyǵa elektr energıasyn berýdi, eger tutynýshy shartta belgilengen merzimde tutynylǵan elektr energıasy úshin tólem jasamasa nemese tolyq tólemese, ony aldyn ala habardar etken jaǵdaıda, tolyq nemese ishinara toqtatýǵa quqyly».

Almatydaǵy turǵyn úı keshenderiniń ishinde eń úlken qaryzdy «Alma Sıtı» JK jınaqtaǵan — 306,2 mln teńge. «Shuǵyla» JK-niń bereshegi 175,4 mln, «Jas Qanat» — 122,9 mln, «Alataý Sıtı» — 105,4 mln teńgeni quraıdy. Odan ári 82 mln teńge qaryzy bar «Krıstal» JK, «Adel» — 73,6 mln, Alem City — 71,6 mln, Qargaly City — 54,6 mln jáne «12 mesásev» — 48,6 mln teńge. Tizimge sondaı-aq «Mıras», Esentai City, Dragon City, «Dom na Abaıa», «Ojet», «Altyn Býlak-1», AFD Plaza, «Han Tengrı», «13 mıkroraıon», «Amal» jáne Rams Luxury kirdi. Ermensaı shaǵyn aýdanynyń bereshegi bólek kórsetilgen.

Almaty oblysynda jarıalanǵan tizimdegi eń úlken somany Medeu City JK qaryzǵa alǵan — 93,5 mln teńge. Altin City-de 43,9 mln, Gres Park-te 37,2 mln, Tamarix-te 34 mln teńge jınaqtalǵan. Tizimde sondaı-aq «Ashyq tóbe», «Dostar», «Almataý», Aspan City-2 jáne Galamat bar.

«Energosbytta» turǵyndardan komýnaldyq tólemderdi jınaıtyn OSI, KSK jáne basqarýshy kompanıalarǵa jeke úndeý jasap, olardy energıa resýrstaryn jetkizýshilerge aqshany ýaqtyly aýdarýǵa shaqyrdy. Elektr qýatyn óshirýden basqa, bereshekti sot arqyly óndirip alýǵa, keıinnen sot sheshimin májbúrlep oryndaýǵa bolady.