Abaı kúni qarsańynda Almatyda uly aqyn ári aǵartýshynyń murasyna arnalǵan mádenı kesh ótti. Myńdaǵan kórermen ashyq aspan astynda Abaı Qunanbaevtyń shyǵarmashylyǵyna úńilý úshin jınaldy, dep habarlaıdy infohub.kz.
Ashyq aspan astyndaǵy sahnada kórermenderge «Alǵashqy kitap» derekti fılmi kórsetildi, odan keıin mýzykalyq-poetıkalyq jáne konserttik baǵdarlama bastaldy.
Qazaqstan Respýblıkasy Mádenıet jáne aqparat mınıstrligi men Ulttyq kınony qoldaý memlekettik ortalyǵynyń qoldaýymen túsirilgen derekti fılm Abaı shyǵarmalarynyń alǵashqy jınaǵynyń jaryqqa shyǵý tarıhyn baıandaıdy. Dokýdrama janryndaǵy týyndy aqynnyń 1909 jyly Sankt-Peterbýrgte İlıas Boraǵanskı baspasynda jaryq kórgen tuńǵysh kitabynyń taǵdyryn áńgimeleıdi.
Fılm avtorlary Abaı shyǵarmalarynyń qalaı jınalyp, baspaǵa daıyndalǵanyn, kitaptyń shyǵýyna kimder qatysqanyn, onyń dál Sankt-Peterbýrgte jaryq kórýiniń sebebin jáne basylym jolynda qandaı qıyndyqtar bolǵanyn baıandaıdy.
Kórsetilimnen keıin Almaty qalalyq mádenıet basqarmasy uıymdastyrǵan mýzykalyq-poetıkalyq baǵdarlama ótti. Qoıylymǵa Talǵat Kúzembaev, Lıdıa Kadenova, Erlan Bilál, Darhan Súleımenov, Asan Májıt, Dınara Kemelhan, Erden Jaqsibek, «Alashuly» toby jáne Hor kapelasy qatysty.
Kesh Almaty Summer Fest festıvalimen jalǵasty. Sahnada Maqpal Júnisova, Janar Dýǵalova, Asqat Tarǵyn, Nurlan Berdibaev, Serik Isaqan, Ayarai, Birzhan Demeuuly, Nurtore, Magsoul, KeshYou, 6ellucci toptary, IL Canto kvarteti jáne basqa da ártister Abaıdyń ánderi men óleńderin oryndady.
Kesh ashyq aspan astynda Abaı ánderin birlesip oryndaýmen aıaqtaldy — ártisterge myńnan astam kórermen qosyldy.