Almatyda abattandyrý erejeleriniń saqtalýyn baqylaý kúsheıtildi. Jyldyń alǵashqy alty aıynda ereje buzǵany úshin 111,9 mln teńgeden astam aıyppul salyndy, dep habarlaıdy infohub.kz.
Komýnaldyq ınfraqurylym jáne turǵyn úı ınspeksıasy basqarmasynyń málimetinshe, jyl basynan beri zańdy tulǵalar 8 972 abattandyrý pasportyn resimdep, josparlanǵan kórsetkishterden asyp túsken. «Abattandyrý pasporty irgeles aýmaqty kútip-ustaýǵa jaýapkershilikti bekitýdi rastaıdy», — dep túsindirdi vedomstvoda.
Alǵashqy alty aıda mamandar 5 myńǵa jýyq aýyzsha eskertý jasap, ÁQBtK-niń 505-baby boıynsha 9 679 ákimshilik materıal resimdedi. Salynǵan aıyppuldardyń jalpy somasy 111,9 mln teńgeni qurady.
Qala ákiminiń tapsyrmasy boıynsha pasporttandyrý naýqany qaıta jandandyrylǵannan keıin taǵy 672 abattandyrý pasporty resimdeldi. Osy kezeńde 547 ákimshilik materıal jasalyp, aıyppul somasy 12,7 mln teńgeden asty.
Vedomstvo mundaı sharalar nysan ıeleriniń irgeles aýmaqtardy kútip-ustaýǵa jáne qalada tártip saqtaýǵa jaýapkershiligin arttyrýǵa baǵyttalǵanyn atap ótti.