Almaty turǵyndary Úlken Almaty ózeniniń jaǵalaýyndaǵy betonǵa qamalǵan aǵashtardyń taǵdyryna alańdaýly. Áleýmettik jelilerde ákimdikke jasyl jelekterdi qutqarý týraly ótinish paıda boldy, alaıda ekologıa basqarmasy tamyr júıesin bosatýdan bas tartty, dep habarlaıdy infohub.kz saıty.
Threads áleýmettik jelisinde valentina_ayar degen qoldanýshy beton qurylymdardyń ishinen ósken aǵashtardyń fotosýretterin jarıalap, qala bıligine aralasýdy surady. «Myna aǵashtardy bosatyńyzdarshy! Qazir: ústinde asfált, aınalasynda beton! Quryp ketedi! Bul Úlken Almatyda, Ál-Farabıden sál tómen», — dep jazdy ol.
Qalalyq ekologıa jáne qorshaǵan orta basqarmasy jaǵdaıǵa túsinikteme berdi. Sheneýnikter bul aǵashtardyń qoldanystaǵy qurylymdarda ózdiginen ósken jabaıy óskinder ekenin túsindirdi. «Bul ýchaskedegi beton jabyny aǵashtar paıda bolǵanǵa deıin salynǵan jáne Úlken Almaty ózeniniń arnasyn nyǵaıtýǵa arnalǵan gıdrotehnıkalyq qurylystyń bóligi bolyp tabylady. Osyǵan baılanysty aǵashtardyń tamyr júıesin bosatý úshin beton qurylymdardy bólshekteý múmkin emes, óıtkeni bul gıdrotehnıkalyq qurylystyń turaqtylyǵy men paıdalaný qaýipsizdigine áser etýi múmkin», — delingen resmı jaýapta.
Alaıda jarıalanym avtory men basqa da qoldanýshylar bul túsiniktemege kóńili tolmaı, aǵashtardyń beton arqyly óse almaıtynyn alǵa tartýda. Olar jasyl jelekterdi qutqarý qajettigin alǵa tartýdy jalǵastyrýda.