Almaty ákimdigi daýly jasandy ıntellekt bannerlerin sapaly posterlerge aýystyrýǵa ýáde etkenimen, eki apta ótse de jaǵdaı ózgermegen. Kursiv Media redaksıasy Nazarbaev kóshesin tekserip, bannerlerdiń kópshiligi ornynda turǵanyn, keıbiri sur tyǵyz matamen jabylǵanyn anyqtady, dep habarlaıdy infohub.kz saıty.
Eske salaıyq, bastapqyda kóshede neırojeli jasaǵan Shoqan Ýálıhanovtyń portreti men dáıeksózi bar banner paıda bolǵan. Ondaǵy qazaq mátininde kóptegen qateler jiberilip, bas kıimi tarıhqa saı kelmegen. Keıin Ahmet Baıtursynov, Abaı Qunanbaev jáne Baýyrjan Momyshulynyń burmalanǵan beıneleri bar basqa posterler de tabyldy – neırojeli dáıeksózderdiń tek alǵashqy bólikterin durys berip, jalǵasyn oıdan shyǵarǵan.
Osydan keıin ákimdik barlyq jasandy ıntellekt bannerleri alynyp, standartqa saı jańalary ázirlenip jatqanyn málimdegen. Alaıda tekseris daýly bannerlerdiń alynbaǵanyn kórsetti. Kamera obektıvine burmalanǵan jasandy ıntellekt júzderi bar klasıkterdiń portretteri ilinip turǵan. Bılik birqatar sýretterdi sur tyǵyz matamen japqan – múmkin jumysshy qoly nemese ýaqyt jetpegen.
Generasıalanǵan bannerlerdi ornatqan merdiger – «Astana Stroı Invest» korporasıasy JSHS. Ol bannerlerdi qalalyq Qurylys basqarmasymen kelispeı, óz betinshe ornatqan. Shoqan Ýálıhanov posteri úshin kompanıaǵa eskertý jasalǵan, al keıingi sýretterdi ornatqannan keıin oǵan vedomstvonyń jazbasha kelisiminsiz kez kelgen materıaldardy ornalastyrýǵa resmı túrde tyıym salyndy.