Qazaqstan Respýblıkasynyń Jasandy ıntellekt jáne sıfrlyq damý vıse-mınıstri Ǵızzat Baıtursynov úkimettegi brıfıńte jasandy ıntellektini qoldaný táýekelderi týraly aıtyp, Almaty ákimdiginiń qyzmetkeriniń JI kómegimen fotosýrettegi qoqysty óshirgen áreketine túsinikteme berdi, dep habarlaıdy infohub.kz saıty.
Vıse-mınıstrdiń aıtýynsha, jasandy ıntellekt adamdardy eshqashan almastyrmaıdy jáne árqashan kómekshi-assıstent rólinde bolady.
«Shartty túrde aıtsaq, siz JI arqyly qandaı da bir jumysty jyldamdata alasyz, keıbir bıznes-prosesterdi avtomattandyra alasyz. Eger aqparat aǵyny kóp bolsa, JI-di súzgi retinde paıdalanýǵa bolady. Biraq kez kelgen jaǵdaıda sońǵy sheshimdi adam qabyldaıdy, bizdiń ustanymymyz osyndaı. Ákimdik qyzmetkerine keletin bolsaq: munda JI-diń kinási joq, munda JI qural retinde áreket etedi. Bul jumysty nege oryndamaǵanyn sol adamnan suraý kerek. Al JI munda taza qural, ony jaqsy maqsatta da, osyndaı maqsatta da paıdalanýǵa bolady. Meniń qosarym osy», — dedi Baıtursynov.
Eske salaıyq, maýsym aıynda Almatynyń Bostandyq aýdany ákimdiginde JI kómegimen fotosýrettegi qoqysty óshirip, fotony tazalaý jumysynyń naqty nátıjesi retinde usynǵan sheneýnik jumystan shyǵarylǵan bolatyn.