Qazaqstannyń eki megapolısi álemniń úzdik 300 qalasynyń qataryna qaıta endi, alaıda bir jyl ishinde jahandyq reıtıńtegi ornyn nasharlatty. Oxford Economics kompanıasy daıyndaǵan Global Cities Index 2026 tiziminde Almaty 265-orynǵa, al Astana 281-orynǵa jaıǵasty, dep habarlaıdy infohub.kz saıty.
Bir jyl buryn, 2025 jylǵy reıtıńte Almaty 258-satyda, Astana 276-satyda turǵan. Osylaısha, ótken jyly ońtústik astana jeti satyǵa, soltústik astana bes satyǵa tómendedi. Soǵan qaramastan, eki qala da Ortalyq Azıa qalalary arasyndaǵy kóshbasshylyq mártebesin saqtap qaldy.
Qazaqstandyq megapolıster eń úzdik nátıjesin adamı kapıtal deńgeıi boıynsha kórsetti. Bul kórsetkish boıynsha Almaty 66-orynǵa, Astana 98-orynǵa turaqtady. Eki qala da Ankara, Varshava, Praga, Tallın jáne Máskeýdi basyp ozdy.
Aıta keteıik, bir jyl buryn Almaty adamı kapıtal boıynsha 64-orynda edi. Bul sanatta qalanyń kadrlyq áleýetiniń sapasy men aýqymy, bilim deńgeıi, kásibı daǵdylar, eńbek naryǵynyń jaı-kúıi, sondaı-aq bilikti mamandardy tartý jáne ustap qalý qabileti eskeriledi.
Ekonomıkalyq kórsetkishter boıynsha Astana 264-orynǵa, al Almaty 288-satyǵa ornalasty.
Global Cities Index álemniń 1000 iri qalasyn qamtıdy. Oxford Economics olardy bes negizgi baǵyt boıynsha baǵalaıdy: ekonomıka, adamı kapıtal, ómir súrý sapasy, ekologıa jáne memlekettik basqarý.
Reıtıńti jasaý barysynda ekonomıkalyq kórsetkishter, bilim jáne eńbek naryǵy, halyqtyń tabysy, turǵyn úı quny, qaýipsizdik, qorshaǵan ortanyń jaı-kúıi, sondaı-aq ınstıtýttar men retteý sapasy eskeriledi. 2026 jyly alǵashqy úsh oryndy Nú-Iork, London jáne Parıj saqtap qaldy.