Almatynyń Áýezov aýdanynda «Halyq qatysatyn búdjet» baǵdarlamasy aıasynda aýlalar men qoǵamdyq keńistikterdi abattandyrý jalǵasýda. Bıyl turǵyndardyń ózderi usynǵan 29 joba júzege asyrylýda, dep habarlaıdy infohub.kz saıty.
Aıaqtalǵan nysandardyń biri Jandosov kóshesi, 182a jáne Afsınao kóshesi, 4 mekenjaılarynda ornalasqan. Jandosov kóshesindegi aýlada jaryqdıodty shamdary bar jańa jaryqtandyrý tirekteri, shatyr astynda qosymsha jaryq, beınebaqylaý júıesi jáne qorshaý ornatyldy. Sondaı-aq jańa elektr jelileri tartyldy.
Qaýipsiz tartan jabyny bar balalar alańy tolyq jańartyldy. Munda oıyn keshenderi, átkenshekter, syrǵanaq, batýt, besedka jáne basqa da elementter paıda boldy. Sportpen aınalysý úshin vorkaýt alańy, ashyq jattyǵý quraldary bar alań, ústel tenısi jáne shatyr jabdyqtaldy. Otbasylyq demalys úshin pergola ornatyldy.
«Aýla túgeldeı ózgerdi. Endi munda balalarǵa arnalǵan zamanaýı ári qaýipsiz alań, jaqsy jaryqtandyrý, sportpen aınalysýǵa oryn bar. Tilekterimizdiń eskerilip, júzege asqanyn kórý óte qýantady. Osyndaı jumys úshin rahmet!» – dep jaqyn mańdaǵy úıdiń turǵyny Temirlan áserimen bólisti.
Taǵy bir aýla Afsınao kóshesinde abattandyryldy. Munda ártúrli jastaǵy balalarǵa arnalǵan oıyn keshenderi, batýt, átkenshekter, karýselder, balansırler jáne besedka ornatyldy. Sportpen aınalysý úshin eki vorkaýt alańy jabdyqtaldy. Sondaı-aq aýmaqtyń jaryqtandyrýy jańartyldy.
«Abattandyrýdan keıin aýla áldeqaıda jaıly ári qaýipsiz boldy. Endi men kún saıyn balalarymmen osynda serýendeımin. Ásirese keshke aýmaqtyń jaqsy jaryqtandyrylǵany qýantady, sondyqtan kóshede tynysh ýaqyt ótkizýge bolady», – dedi aýdan turǵyny Sábıra.
Áýezov aýdanynda «Halyq qatysatyn búdjet» baǵdarlamasy boıynsha jumystar jalǵasýda. Jobalar turǵyndardyń usynystaryn eskere otyryp qalyptastyrylyp, aýlalardy, balalar jáne sport alańdaryn jańartýǵa baǵyttalǵan.