Almaty turǵyny kóliginiń aldyńǵy oryndyǵynda jatqan zattary úshin aıyppul aldy: kamera olardy baılanbaǵan jolaýshy dep qate tanyǵan bolýy múmkin, dep habarlaıdy infohub.kz saıty.
Evgenıa Shestakova áleýmettik jelide kamera jolaýshy tasymaldaý erejesiniń buzylǵanyn tirkegenin, alaıda aldyńǵy oryndyqta tek jeke zattary bolǵanyn aıtty. Qaýlyǵa qosa tirkelgen sýrette sómkeler men basqa da zattar kórinedi. Kólik ıesiniń pikirinshe, júıe olardy baılanbaǵan jolaýshy dep qate tanyǵan.
«Shynyn aıtsam, búgin tańerteń aıyppul týraly habarlamany kórip qatty tańǵaldym. Al qaýlyny ashyp, kózime ózim senbedim. Endi, aldyńǵy jolaýshy ornynda jatqan sómkeler men paketterdi de baılaý kerek sıaqty. Maǵan úlken aq paketke baılanysty aıyppul salyndy. Iá, ol kólemdi, biraq adamǵa múlde uqsamaıdy. Ásirese sýrette qarapaıym paket ekeni anyq kórinip tur. Sondyqtan, qurmetti qazaqstandyqtar, endi tek jolaýshylardy ǵana emes, sómkeler men paketterdi de baılaýǵa týra keletin sıaqty — kem degende, aıyppulmen aınalysqyńyz kelmese», — dep pikir bildirdi Evgenıa.
Kólik ıesi aıyppuldy daýlamaq, sebebi kamera salondaǵy zattardy baılanbaǵan jolaýshy dep qate tanyǵan dep esepteıdi.
Advokat Jandos Palmanov buryn túsindirgendeı, júrgizýshiler birneshe jaǵdaıda qaýlyǵa shaǵymdana alady: jaýapkershilikke tartý tártibi buzylsa, kólik ıesiniń derekterinde qate bolsa, kóliktiń memlekettik tirkeý nómiri durys anyqtalmasa, buzýshylyqtyń jetkilikti dáleli bolmasa, kameranyń jaramdylyǵyna kúmán týsa nemese foto jáne beınejazbalar aıyptalǵan buzýshylyqty rastamasa. Sarapshy ár jaǵdaıdy jeke baǵalaý qajet ekenin atap ótti.
Advokattyń aıtýynsha, ákimshilik quqyq buzýshylyq týraly qaýlyǵa ony alǵan nemese tabys etken kúnnen bastap 10 táýlik ishinde shaǵymdanýǵa bolady. Merzim ótse de, shaǵymdaný quqyǵy joǵalmaıdy: dáleldi sebepter bolsa, ýákiletti organǵa nemese sotqa ótinish berip, merzimdi qalpyna keltirýge bolady. Zańger shaǵym berýden buryn qaýlyny muqıat zerdelep, buzýshylyqty tirkeýdiń barlyq materıaldaryn saqtap, óz dáleldemelerińizdi — beınejazbalardy, sýretterdi, kýálardyń aıǵaqtaryn jáne basqa qujattardy jınaýdy usynady.
Shaǵymdy eGov jáne eOtinish platformalary, Ákimshilik quqyq buzýshylyqtardyń biryńǵaı tizilimi (ÁQBT) arqyly, sondaı-aq Almaty qalasy Polısıa departamentiniń Ákimshilik polısıa basqarmasynyń ákimshilik tájirıbe bólimine jeke baryp (Baıtursynov kóshesi, 185b) berýge bolady.