Almaty máslıhatynyń kezekten tys sesıasynda depýtattar qalanyń 2040 jylǵa deıingi bas josparyn túzetý jobasyn qarady. Qujat keshendi qala qurylysy saraptamasynan oń qorytyndy aldy, dep habarlaıdy infohub.kz saıty.
Sesıa barysynda Almaty ákiminiń orynbasary Beıbit Shahanov atap ótkendeı, jobanyń negizgi mindetteri — tabıǵatty qorǵaý sharalaryn kúsheıtý, ekologıalyq ahýaldy jaqsartý, seısmıkalyq mıkroaımaqtaý nátıjelerin eskere otyryp, qalalyq ortany teńgerimdi damytý, tabıǵı aýmaqtardy saqtaý jáne taý bókterlerin negizsiz qurylystan qorǵaý.
«Kólik júıesin damytýǵa, metropolıten men JRT jelileriniń trassasyn ózgertýge, jańa kólik-almasý toraptaryn qalyptastyrýǵa, sondaı-aq Almatynyń irgeles aýmaqtarmen jáne Almaty oblysyndaǵy Alataý qalasynyń aglomerasıalyq aımaǵymen ózara baılanysyn esepke alýǵa erekshe nazar aýdaryldy. Bas jospardy túzetý jasyl beldeýdi naqty bekitip, keńeıtedi, Ál-Farabı dańǵylynan joǵary, sý qorǵaý jáne seısmıkalyq qaýipti aımaqtardaǵy qurylysty shekteıdi. Bas jospardyń sheshimderi turǵyndardyń negizgi suraqtaryna jaýap beredi: turǵyn úı qaıda ornalasady, mektepter, balabaqshalar, medısınalyq mekemeler, qoǵamdyq kólik, jasyl jáne qoǵamdyq keńistikter qanshalyqty qoljetimdi bolady, ınjenerlik jeliler qalaı damıdy jáne qandaı aýmaqtardy shamadan tys qurylystan saqtaý qajet», — dedi Beıbit Shahanov.
Qala ákiminiń orynbasary jobanyń birinshi basymdyǵy — Almatynyń tabıǵı negizin saqtaý ekenin atap ótti. Taý bókterleriniń landshafttaryn, sý resýrstaryn jáne kógaldandyrylǵan aýmaqtardy qorǵaý, sondaı-aq qalanyń úzdiksiz ekologıalyq qańqasyn qalyptastyrý kózdeledi. Onyń negizin taý bókterleri, ózen ańǵarlary, saıabaqtar men skverler quraıdy. Olardy birtutas júıe retinde damytý qalanyń ekologıalyq jaǵdaıyn jaqsartýǵa, tabıǵı baılanystardy saqtaýǵa jáne turǵyndar úshin demalys oryndarynyń qoljetimdiligin arttyrýǵa múmkindik beredi.
«Tabıǵı shekteýler, seısmıkalyq mıkroaımaqtaý nátıjeleri jáne sý qorǵaý aımaqtaryn saqtaý talaptary jańa qurylys pen ınfraqurylymdy ornalastyrý kezinde eskeriletin bolady. Qalany damytý tabıǵı áleýetti qysqartý esebinen emes, ony saqtaý jáne qalpyna keltirý arqyly júrýi tıis», — dedi Beıbit Shahanov.
Onyń aıtýynsha, joba Almatyny damytýdyń bes negizgi aýmaqty biriktiretin polısentrlik modelin saqtaıdy jáne naqtylaıdy: «Tarıhı ortalyq», «Shyǵys qaqpa», «Soltústik», «Ońtústik-Batys» jáne «Batys».
«Bizdiń mindetimiz — jumys oryndaryn, qyzmetterdi, áleýmettik ınfraqurylymdy jáne qoǵamdyq fýnksıalardy qala aýdandary arasynda birkelki bólý, turǵyndar kúndelikti ómirge qajetti negizgi múmkindikterdi turatyn jerine jaqyn alýy úshin. Bul kúndelikti qalanyń bir shetinen ekinshi shetine qatynaýdy qysqartyp, ortalyq magıstraldardaǵy júktemeni azaıtady. Tarıhı ortalyq óziniń mádenı jáne sáýlettik biregeıligin saqtaı otyryp, artyq kóliktik jáne fýnksıonaldyq júktemeden birtindep bosaýy tıis», — dep qosty ol.
Jańartylǵan qujat ózekti derekterge negizdelgen jáne ekologıalyq, seısmıkalyq, kóliktik, áleýmettik jáne ınfraqurylymdyq shekteýlerdi eskere otyryp, qalany teńgerimdi damytýǵa baǵyttalǵan.