Almaty máslıhatynyń kezekten tys sesıasynda qala ákiminiń orynbasary Beıbit Shahanov keshendi qala qurylysy saraptamasynan oń qorytyndy alǵan 2040 jylǵa deıingi Bas jospardy túzetý jobasynyń negizgi erejelerin tanystyrdy, dep habarlaıdy infohub.kz saıty.
Onyń aıtýynsha, Bas jospardy túzetý jumysynyń mańyzdy bóligi qala turǵyndarymen ózara is-qımyl boldy. Qoǵamdyq talqylaýlar barysynda túsken usynystar men ótinishter taldanyp, zańnama men qala qurylysy shekteýlerin eskere otyryp, múmkin bolǵan jerlerde jobalyq sheshimderde kórinis tapty. Strategıalyq ekologıalyq baǵalaýǵa jáne Bas jospardy iske asyrýdy odan ári qoǵamdyq baqylaýǵa erekshe nazar aýdaryldy.
«Bas jospardy odan ári iske asyrýdyń mańyzy zor. Qujatty bekitý qalanyń odan ári damýynyń negizi bolyp tabylady, alaıda onda kózdelgen sheshimderdi dáıekti oryndaý negizgi kezeń bolmaq. Osyǵan baılanysty Bas jospardyń iske asyrylýyn, qurylys parametrleriniń saqtalýyn, áleýmettik jáne ınjenerlik ınfraqurylymnyń ýaqtyly damýyn, sondaı-aq jasyl jáne tabıǵı aýmaqtardyń saqtalýyn únemi monıtorıńileýdi qamtamasyz etý qajet. Halyqpen keri baılanys jáne turǵyndardy negizgi jobalardyń iske asyrylýy týraly habardar etý mańyzdy quramdas bólik bolyp qala beredi. Bul qala qurylysy sheshimderiniń ashyqtyǵyn arttyryp, demografıalyq, kóliktik, ekologıalyq jáne áleýmettik jaǵdaıdyń ózgeristerin ýaqtyly eskerýge múmkindik beredi», – dep atap ótti Beıbit Shahanov.
Ákim orynbasary atap ótkendeı, jańartylǵan qujat ózekti derekterge negizdelgen jáne ekologıalyq, seısmıkalyq, kóliktik, áleýmettik jáne ınfraqurylymdyq shekteýlerdi eskere otyryp, qalanyń teńgerimdi damýyna baǵyttalǵan.
«Qalanyń aldynda Almatynyń tabıǵı áleýetin saqtaý, jaıly qalalyq ortany qamtamasyz etý, kólik baılanysyn arttyrý, halyqtyń ósýi úshin qajetti jaǵdaılar jasaý jáne sonymen birge qalanyń tarıhı biregeıligin saqtaý mindeti tur», – dep qosty Beıbit Shahanov.