Almaty qalasy sáýlet jáne qala qurylysy basqarmasynyń basshysy Almas Jańbyrshy máslıhat sesıasynda depýtattarǵa qalanyń qaı aýdandarynda qurylys júrgizýge tyıym salynǵanyn túsindirdi, dep habarlaıdy infohub.kz saıty.
Kezekti máslıhat sesıasynda taý bókterindegi aýmaqtardy ıgerý máselesin depýtat Erkin Raqyshev kóterdi. Ol bas jospardy túzetý qala turǵyndarynyń súıikti demalys oryndaryn turǵyn úı keshenderiniń qurylysynan qorǵaýdy kózdeıtinin surady.
«Bas jospardy túzetý qala turǵyndary demalyp, serýendeıtin jerlerde turǵyn úı keshenderin salýǵa tyıym salýdy kózdeı me? Qurylysqa tolyǵymen tyıym salynatyn aımaqtar anyqtaldy ma? Biz áleýmettik jáne týrısik nysandar úshin ınfraqurylymdy damytý qajettigin túsinemiz, alaıda tabıǵatty saqtap, turǵyndardyń qaýipsizdigin qamtamasyz etýge múmkindik beretin shekara qaıda ótedi?» — dep surady depýtat.
Almaty qalasy sáýlet jáne qala qurylysy basqarmasynyń basshysy Almas Jańbyrshy tıisti shekteýler qala qurylysy qujattarynda qarastyrylǵanyn málimdedi.
Onyń aıtýynsha, qalanyń joǵarǵy bóliginde qurylystyń bıiktigine shekteý qoıylǵan. Bul Talǵar traktisi, Shyǵys aınalma avtomobıl joly, Ál-Farabı dańǵyly, Saıyn kóshesi, Jandosov kóshesi (Saıynnan qala shekarasyna deıin) boıymen ótetin shekaradan ońtústiktegi aýmaqqa qatysty.
«Bul aımaqta nysandardyń bıiktigi 12 metrden aspaýy tıis. Densaýlyq saqtaý, bilim berý, mádenıet jáne dinı maqsattaǵy nysandar úshin bıiktik 25 metrge deıin ruqsat etiledi. Qalanyń bul bóliginde kópqabatty turǵyn úılerdi salýǵa tyıym salynǵan», — dep túsindirdi Almas Jańbyrshy.
Sonymen qatar megapolıstiń joǵarǵy bóliginde tabıǵı klasterdi saqtaý qajettiligin eskere otyryp, negizinen áleýmettik jáne týrısik nysandardy salý kózdelýde.
Depýtat qurylysqa múlde jol berilmeıtin aýmaqtar anyqtalǵan-anyqtalmaǵanyn jeke naqtylady. Jańbyrshy qurylysqa eńisi 15 gradýstan asatyn ýchaskelerde tyıym salynǵanyn jaýap berdi. Sonymen qatar qurylysqa sý qorǵaý aımaqtarynda jáne kóshkin prosesterine ushyraǵan aýmaqtarda jol berilmeıdi.
Buǵan deıin biz Almaty máslıhatynyń depýtattary kezekten tys sesıada qalanyń 2040 jylǵa deıingi bas josparyn túzetý jobasyn qaraǵanyn jazǵan bolatynbyz.