Almaty – Bishkek halyqaralyq tasjolynyń eń qarqyndy ýchaskeleriniń birin keńeıtý jáne kúrdeli jóndeý jumystary bastaldy. Almaty oblysynyń Qarasaı aýdanyndaǵy 19-nan 27-shi kılometrge deıingi ýchaskede kún saıyn 70 myńnan astam kólik ótedi, dep habarlaıdy infohub.kz QazAvtoJolǵa silteme jasap.
Tórt jolaqty aǵymdaǵy jol kólik aǵynyna tótep bere almaı, únemi keptelister týǵyzyp, jol-kólik oqıǵalarynyń qaýpin arttyryp otyr.
Qaıta qurýdan keıin jolaq sany eki ese artyp, tórtten segizge deıin jetedi. Bul ýchaske úzdiksiz qozǵalystaǵy magıstraldy kóshe talaptaryna saı bolady.
Joba aıasynda «Taǵa» úlgisindegi eki kólik aıyrma jolyn, toǵyz aspaly jaıaý júrginshiler ótkelin salý, trotýarlar men syrtqy jaryqtandyrýdy jáne jańa kúrdeli jol tósemin ornatý kózdelgen. Sonymen qatar, gaz qubyrlary, sý qubyrlary jelileri, elektr jáne talshyqty-optıkalyq baılanys jelilerin qosa alǵanda, ınjenerlik komýnıkasıalardy kóshirý qajet bolady.
Jumystar aıaqtalǵannan keıin Almatyǵa kiretin mańyzdy kire beristerdiń biriniń ótkizý qabileti aıtarlyqtaı artyp, qala men onyń mańyndaǵy eldi mekender arasyndaǵy jol júrý ýaqyty qysqarady dep kútiledi.