Almaty men eldiń ońtústik óńirlerindegi aýqymdy elektr jaryǵynyń sónýi qalalardyń qurylys qarqynyna ınfraqurylymnyń úlgermeı jatqany týraly máseleni taǵy da kóterdi. Ekonomıs, Ulttyq ekonomıka mınıstrligi janyndaǵy Qoǵamdyq keńestiń tóraǵasy, BJZQ táýelsiz dırektory Eldar Shamsýtdınov qýat tapshylyǵy júıeli máselege aınalyp bara jatqanyn aıtady, dep habarlaıdy infohub.kz.
Ol óziniń Telegram-arnasynda Qazaqstanda turǵyn úı kóbinese qajetti komýnaldyq jáne energetıkalyq ınfraqurylymnan jyldam salynyp jatqanyna nazar aýdardy.
«Páterler krandaǵy sýdan tezirek paıda boldy. Jelilerge túsetin júkteme artyp keledi, jańa qýattar oǵan ilese almaı otyr», – dedi Shamsýtdınov.
Onyń aıtýynsha, bul jaǵdaı Astanada da baıqalǵan. 2022 jyly 2,4 mln sharshy metr turǵyn úı paıdalanýǵa berilgennen keıin, 2023 jyly elorda sý tapshylyǵyna tap boldy. Ekonomıs eldiń basqa iri qalalarynda da osyndaı qaýip bar dep sanaıdy.
Osy aıada Almaty 14 tamyzda aýqymdy blekaýtqa ushyraǵan óńirlerdiń qatarynda boldy. QR Energetıka mınıstrliginiń habarlaýynsha, sebep – Ortalyq Azıa energojúıeleri tarapynan elektr energıasy aǵynynyń kúrt ózgerýinen týyndaǵan qýattyń avarıalyq teńgerimsizdigi.
Saldarynan ulttyq energojúıeni aýyr zardaptardan qorǵaý úshin tutynýshylardyń bir bóligin ýaqytsha óshirgen avarıaǵa qarsy avtomattandyrý iske qosyldy.
Qazir júıelik operator KEGOC qalpyna keltirý jumystaryn júrgizip, júktemeni kezeń-kezeńimen jelige qaıtarýda. Energetıka mınıstrligi jaǵdaıdy baqylaýda ustap otyrǵanyn málimdedi.
Óshirýler saldarynan Almatyda baǵdarshamdar jumysyn toqtatty, metro toqtap, keıbir aýdandarda sý berilýde úzilister boldy. 2GIS derekteri boıynsha qaladaǵy keptelis 9 balǵa jetti.
Shamsýtdınov mundaı oqıǵalardy tek avarıalarmen ǵana emes, jınaqtalǵan ınfraqurylymdyq problemalarmen baılanystyrady. Onyń pikirinshe, elektr energıasy men sý tutynýdyń ósýi qalalardy damytýǵa jáne jańa qýattar salýǵa neǵurlym salmaqty kózqarasty talap etedi.