Almatyda búgin, 14 tamyzda bolǵan iri blekaýttan keıin qalpyna keltirý jumystary jalǵasýda. Qazirgi ýaqytta qaladaǵy baǵdarshamdardyń shamamen 90 paıyzy elektr jelisine qosylyp, qalypty rejımde jumys istep tur, dep habarlaıdy infohub.kz.
Almaty ákimdiginiń Telegram-arnasynda baǵdarsham nysandaryn qaıta iske qosý kezeń-kezeńmen júrgizilip jatqany atap ótildi. Mamandar jabdyqty tekserip, qalǵan nysandardaǵy júıelerdi qaıta iske qosýda. Tehnıkalyq aqaýlar anyqtalǵan jaǵdaıda qajetti qalpyna keltirý jumystary júrgizilýde.
Jumys qaladaǵy barlyq baǵdarshamnyń qalypty jumysy tolyq qalpyna kelgenshe jalǵasady.
Eske sala keteıik, búgin Almaty men Almaty oblysynda iri blekaýt boldy. Energetıka mınıstrliginiń málimetinshe, onyń sebebi — Ortalyq Azıa energojúıesi tarapynan elektr energıasy aǵynynyń kúrt ózgerýinen týyndaǵan energojúıedegi qýattyń artýy. Sonyń saldarynan avarıaǵa qarsy avtomatıka iske qosylyp, Qazaqstannyń keıbir aımaqtarynda birqatar tutynýshylardyń elektr qýaty óshirildi.
Baǵdarshamdardyń óshýine baılanysty joldarda keptelis paıda bolyp, qala turǵyndary ózderi jol qozǵalysyn retteýge shyqty. Sondaı-aq syrtqy elektrmen jabdyqtaý tolyq toqtaǵandyqtan metropolıten jumysy ýaqytsha toqtatyldy, alaıda keıin metro ádettegi rejımge oraldy. Almaty polısıasy kúsheıtilgen jumys rejımine kóshti.