Turǵyndardyń quqyǵyn qorǵaımyn dep, qurylys kompanıasynan aqy talap etýge bola ma? Almaty qalasynyń Qylmystyq ister jónindegi mamandandyrylǵan aýdanaralyq soty buǵan jol joq dep sheshti. Alqabıler Ernar Rahımjanovty bopsalaýda kináli dep tanydy: tergeý nusqasy boıynsha, ol qurylys kompanıasynan eki páter úshin 17 mlrd teńge talap etip, onyń ornyna zastroıshıkke qarsy naýqandy toqtatýǵa ýáde bergen. Osy úshin er adam segiz jylǵa bas bostandyǵynan aıyryldy, dep habarlaıdy infohub.kz saıty.
Úkimge sáıkes, 2021 jyly Ernar Rahımjanov Almatydaǵy Súleımenov kóshesindegi tórt páterdi aýksıonnan satyp alyp, ony anasyna rásimdegen. Eki jyl ótken soń qasynda «Alma Taý Construction» kompanıasynyń turǵyn úı kesheniniń qurylysy bastalǵan. Sot nusqasy boıynsha, dál sol kezde er adam kompanıany óz jyljymaıtyn múlkin satyp alýǵa májbúrleý josparyn oılastyrǵan.
2024 jyly jazda Rahımjanov qurylys kompanıasyna páterlerdi satyp alýdy usynǵan. Bas tartqan soń, sot anyqtaǵandaı, ol áleýmettik jelilerde beıneler jarıalap, turǵyndardyń jıyndaryn uıymdastyryp, túrli memlekettik organdar men BAQ-qa ótinishter jibere bastaǵan. Munyń bári, aıyptaý nusqasy boıynsha, kompanıa onyń sharttaryna kelispese, oǵan qarsy naýqandy jalǵastyrý qaýpimen qatar júrgen. Talap etiletin soma únemi ósip, eki páterdiń árqaısysyna 8,5 mlrd teńgeden, barlyǵy 17 mlrd teńgege jetken.
Ernar Rahımjanov pen qurylys kompanıasy arasyndaǵy qaqtyǵys tarıhy qylmystyq is aıasynda bastalǵan joq. 2024 jyly ol Orda.kz redaksıasyna azamattyq belsendi retinde habarlasyp, Súleımenov kóshesindegi turǵyn úı kesheniniń qurylysyna qarsy bolǵan. Sonda turǵyndar jobada kózdelgen balabaqshanyń ornyna taǵy bir turǵyn úı keshenin sala bastaǵanyn málimdegen. Rahımjanov qurylysty toqtatý úshin ákimdikke, prokýratýraǵa, Sybaılas jemqorlyqqa qarsy qyzmetke, salalyq mınıstrlikterge jáne basqa da memlekettik organdarǵa ótinish joldaǵanyn aıtqan. Orda.kz jarıalaǵan memlekettik organdardyń jaýaptarynda «Alma Taý Construction» JSHS ruqsat beretin qujattardyń tolyq paketinsiz qurylysqa kiriskeni aıtylǵan. Keıin keıbir buzýshylyqtar joıylǵan, alaıda belsendiler men qurylys kompanıasy arasyndaǵy janjal munymen aıaqtalmaǵan.
Dál osy kópjyldyq qaqtyǵys tarıhyn tergeý keıin bopsalaý sqemasynyń bir bóligi dep atady. Aıyptaý nusqasy boıynsha, shaǵymdar, jarıalanymdar men turǵyndardyń jıyndary kompanıaǵa qysym kórsetý tásiline aınalǵan. Rahımjanovtyń ózi bul baǵalaýmen kelispeı, tek zańnyń saqtalýyn talap etkenin aıtady.
Kompanıa ókiliniń polısıaǵa aryzynan keıin quqyq qorǵaý organdary jedel is-sharalar júrgizdi. Olardyń baqylaýymen aıyptalýshynyń anasynyń shotyna bolashaq mámile úshin 20 mln teńge aldyn ala tólem aýdaryldy. Bul aqsha qylmystyq istiń materıaldaryna negiz boldy.
İs alqabılerdiń qatysýymen qaraldy. Olar Rahımjanovty asa iri mólsherde bopsalaýda kináli dep tanydy. Sot oǵan segiz jylǵa bas bostandyǵynan aıyrý jazasyn taǵaıyndap, jazasyn ortasha qaýipsizdik mekemesinde óteýdi belgiledi. Sonymen qatar, qurylys kompanıasynyń 20 mln teńgeni óndirip alý týraly azamattyq talabyn sot qaraýsyz qaldyrdy — talapker ókili bul talappen azamattyq is júrgizý tártibimen bólek júginetinin málimdedi. Osy qarajatqa salynǵan tyıym saqtalady.
Úkim shyǵarylǵannan keıin Rahımjanov pen onyń advokattary apelásıalyq shaǵymdar berdi. Olar úkimniń kúshin joıyp, isti sottyń basqa quramynda qaıta qaraýǵa jiberýdi suraıdy. Qorǵaýshylardyń pikirinshe, is materıaldarynda er adamnyń óz áreketiniń quqyqqa qaıshy ekenin túsingeni jáne bopsalaýǵa nıettengeni týraly dálelder joq. Al qurylys kompanıasymen kelissózder, advokattardyń aıtýynsha, oǵan tıesili jyljymaıtyn múlikti satýdyń qarapaıym áreketi bolǵan. Sonymen qatar, qorǵaýshylar birinshi satydaǵy sot úkimniń negizine qylmystyq is júrgizý zańyn buza otyryp alynǵan dálelderdi qoıǵan dep sanaıdy. Almaty qalalyq soty apelásıalyq shaǵymdardy óndiriske qabyldady. Olar 21 shildede qaralady. Osy ýaqytqa deıin Rahımjanov qamaýda qalady.