Almatyda aqsha bopsalady dep kúdiktelgen adamdar ustaldy: olar uıymdasqan qylmysqa qarsy kúres basqarmasynyń qyzmetkerleri bolyp tanystyryp, qarýmen qorqytyp, megapolıs turǵynynan aqsha talap etken, dep habarlaıdy infohub.kz saıty.
İshki ister mınıstrliginiń vedimistik saıty habarlaǵandaı, 10 tamyzda bir top adam aldyn ala sóz baılasyp, jábirlenýshini baqylap júrgen. UQQB qyzmetkerleri bolyp tanystyryp, tapanshamen qorqytqan qylmyskerler ony kólikke májbúrlep otyrǵyzyp, qala syrtyna alyp shyqqan.
«Qysym kórsete otyryp, olar jábirlenýshini týysyna qońyraý shaldyrýǵa májbúrledi, ol óz kezeginde olar kórsetken nómirge 3 mln teńge aýdaryp berdi», — dedi İİM-de.
Osy aýyr qylmysty jasaǵany úshin uıymdasqan qylmysqa qarsy kúres basqarmasynyń qyzmetkerleri buryn sottalǵan tórt adamdy ustady, olardyń bireýi buryn kisi óltirgeni úshin jazasyn ótegen.
«Olardyń barlyǵy ýaqytsha ustaý ızolátoryna qamaldy. Tintý barysynda eki myltyq, karabın, gaz tapanshasy jáne oq-dáriler tabylyp, tárkilendi. Tergeý jalǵasýda», — dedi polısıada.
Quqyq qorǵaý organdary Aqtóbe oblysynda da osyndaı qylmystyq is qozǵalǵanyn qosty. Onda buryn sottalǵan óńir turǵyny ustaldy, ol da UQQB qyzmetkeri bolyp tanystyryp, shantaj jáne psıhologıalyq qysym arqyly jergilikti turǵyndardan aqsha bopsalaǵan.
«Azamattardy saq bolýǵa jáne quqyq qorǵaý organdarynyń qyzmetkerleri bolyp tanystyryp júrgen adamdardyń qorqytýy men qysymyna berilmeýge shaqyramyz. Osyndaı jaǵdaılar týyndaǵan kezde dereý polısıaǵa júginý qajet. İİM azamattardyń qaýipsizdigi men zańdy múddelerine qarsy baǵyttalǵan qylmystardy anyqtaý jáne jolyn kesý jumysyn jalǵastyrady», — dep qosty vedomstvoda.