Almaty qalalyq perınataldyq ortalyǵynda shuǵyl ota eki ómir úshin kúreske aınaldy: 35 aptalyq júkti 40 jastaǵy áıelge kesar tiligi jasalyp, sonymen qatar úlken isik alyndy, dep habarlaıdy infohub.kz.
Medısınalyq mekemeniń málimetinshe, naýqas mezgilinen buryn sýy ketip túsken. Tekserý kezinde uryqtyń qan aınalymy buzylǵany anyqtalyp, shuǵyl bosandyrý talap etildi. Ota barysynda hırýrgtar 20×25 santımetrlik mıomany jáne ishektiń jatyrmen jabysyp qalǵanyn baıqaǵan.
Otaǵa Almaty onkologıalyq ortalyǵynyń onkogınekology Raıhan Bolatbekova shaqyrtyldy. Birlesken kúsh-jigerdiń arqasynda dárigerler bosandyrýmen qatar, salmaǵy 5,1 keli bolatyn isikti alyp, naýqastyń jatyry men reprodýktıvti qyzmetin saqtap qaldy. «Nátıjesinde dárigerler bosandyryp qana qoımaı, 5,1 kelilik isikti alyp, áıeldiń jatyryn jáne bala kóterý qabiletin saqtap qaldy. Bul bolashaqta onyń qaıtadan ana bolýyna múmkindik beredi», – delingen habarlamada.
Salmaǵy 2,2 keli bolatyn sharana shala týyldy, biraq reanımasıada baqylaýdan keıin onyń jaǵdaıy turaqtaldy. Qazir ana men bala úılerine shyǵarylyp, ózderin jaqsy sezinýde.
Ádette mıoma túıinderiniń salmaǵy birneshe gramnan 800 gramǵa deıin bolady, biraq asqynǵan jaǵdaılarda olar birneshe kelige jetýi múmkin. Buǵan deıin Qazaqstanda bir kúnde 30 qaterli isik jaǵdaıy anyqtalǵany habarlanǵan bolatyn.