Almatynyń Bostandyq aýdanynda «Igilik Bostandyq» bastamasy aıasynda kóppáterli turǵyn úı qoryn jańǵyrtý jumystary aıaqtaldy — qasbetter men shatyrlardy jańartýǵa 272 mln teńge jeke ınvestısıa jumsaldy, dep habarlaıdy infohub.kz saıty.
Bul týraly óńirlik komýnıkasıalar qyzmetiniń alańynda Bostandyq aýdanynyń ákimi Azamat Beskempiruly Qaldybekov málimdedi.
Rozybakıev kóshesi, 250 mekenjaıyndaǵy 141 páterli turǵyn úıdiń jańǵyrtý jumystary aıaqtaldy. Aýdan ákimdigi 250 mln teńge jeke ınvestısıa tartýdy úılestirip, úı turǵyndaryn da, jergilikti búdjetti de qarjylyq shyǵynnan tolyq bosatty. Ǵımarattyń qasbet qurylymdary zamanaýı jylý oqshaýlaǵysh panelderdi qoldaný arqyly tolyq jańartylyp, keshki ýaqytta ǵımarat sulbasyn aıqyndaıtyn kórkem kontýrlyq jaryq ornatyldy.
«Magıstraldi kósheler boıyndaǵy turǵyn úı qoryn jańǵyrtý Almatynyń birtutas sáýlet stılin qalyptastyrady. Rozybakıev, 250 mekenjaıynda tartylǵan ınvestısıa esebinen biz úıdiń syrtqy kelbetin jańartyp qana qoımaı, onyń energıa tıimdiligin de arttyrdyq», — dep atap ótti Azamat Qaldybekov.
Sonymen qatar aýdanda turǵyndardan aqsha jınamaı-aq eski shatyrlar máselesi sheshildi: «Kóktem-3» shaǵyn aýdanynda tartylǵan 15 mln teńgege qurylysshylar №9 úıdiń 750 m² jumsaq shatyryn jylý oqshaýlaǵysh qabatyn aýystyryp, jeldetý shahtalaryn germetızasıalaı otyryp kúrdeli jóndeýden ótkizdi, al Nazarbaev dańǵyly, 237 mekenjaıynda 7 mln teńge demeýshilik qarajat esebinen 320 m² gıdrooqshaýlaǵysh jabyn kúrdeli jóndeldi, bul qys aldynda sý aǵý máselesin tolyq sheshti.