Almaty turǵyndary áleýmettik jelilerde Esentaı ózeni boıyndaǵy jaǵalaýda túsirilgen fotosýretter men beınejazbalardy belsendi túrde talqylap jatyr. Qala turǵyndary egeýquıryqtardyń kóptigine shaǵymdanýda, dep habarlaıdy infohub.kz saıty.
Facebook qoldanýshysy Sáýle Qobjanova kemirgishterdiń taralýyna narazylyǵyn bildirgen jazba jarıalady. «Esentaı ózeni boıyndaǵy Terenkýrdy (jaǵalaýdy) egeýquıryqtar basyp aldy! Terenkýrdaǵy ózen boıynda mekendegen, bárimiz asyrap júrgen ıtter men mysyqtardy kim aýlap áketýge oılandy?! Mysyqtar men ıtter turǵanda, egeýquıryqtar Terenkýrdan ketken edi. Al qazir olar óte kóp júgirip júr. Óte úlken. Uıatsyz. Adamdardan múldem qoryqpaıdy. Joldarda da, aryqtarda da, gabıondarda da, bóget tostaǵanynda da, oryndyqtarda da júr», — delingen habarlamada.
Almaty qalasy ákimdiginiń komýnaldyq ınfraqurylym jáne turǵyn úı ınspeksıasy basqarmasynyń mamandary tilshige 2026 jyly megapolıs aýmaǵynda bekitilgen kestege sáıkes josparly deratızasıalyq is-sharalar júrgizilgenin túsindirdi. Olar kemirgishterdiń taralýyn boldyrmaýǵa jáne halyqtyń sanıtarlyq-epıdemıologıalyq salaýattylyǵyn qamtamasyz etýge baǵyttalǵan.
Deratızasıa eki kezeńde júrgiziledi: kóktemgi — 2026 jylǵy 15 naýryz ben 30 sáýir aralyǵynda, kúzgi — 2026 jylǵy 15 qyrkúıek pen 30 qazan aralyǵynda josparlanǵan. Kóktemgi kezeń aıasynda óńdeý jalpy aýdany 47 330,1 gektar aýmaqty qamtydy.
Vedomstvo ózen jaǵalaýlary kemirgishterdiń tirshiligi men kóbeıýi úshin qolaıly orta ekenin atap ótti. Sondyqtan josparly kóktemgi kezeńnen keıin 2026 jylǵy 10 maýsym men 29 shildede Terenkýr aýmaǵynda kemirgishterdi joıý boıynsha qosymsha is-sharalar júrgizildi. «Sońǵy qosymsha óńdeý 2026 jylǵy 29 shildede júrgizilgenin eskere otyryp, qazirgi ýaqytta kemirgishterdiń jasyrynatyn jerlerden shyǵyp, buryn ornalastyrylǵan rodentısıdtik jemniń áserinen keıinnen ólýiniń jekelegen jaǵdaılaryn baıqaý múmkin», — dep naqtylady basqarmada.
Vedomstvo deratızasıadan keıin jekelegen kemirgishterdiń baıqalýy júrgizilgen jumystardyń tıimsizdigin kórsetpeıtinin qosty. «Deratızasıalyq is-sharalar bekitilgen kestege sáıkes júrgiziledi, al qajet bolǵan jaǵdaıda problemalyq ýchaskelerge qosymsha óńdeýler júzege asyrylady», — dep málimdedi basqarmada.