Almatyda Qalalyq perınataldyq ortalyqtyń bazasynda júktiligi asqynǵan áıelderge arnalǵan jańa medısınalyq ortalyq jumysyn bastady. Bolashaq analar MRT jáne saraptamalyq deńgeıdegi ÝDZ apparattarynda ambýlatorıalyq jaǵdaıda tegin tekserile alady — mindetti áleýmettik medısınalyq saqtandyrý aıasynda, sondaı-aq tar mamandardyń keńesin ala alady, dep habarlaıdy infohub.kz saıty.
Qalalyq qoǵamdyq densaýlyq saqtaý basqarmasynyń málimetinshe, ortalyqqa joldamany tirkelgen jerdegi emhanalar beredi.
«Ortalyqtyń ashylýy qaýip tobyndaǵy júkti áıelderge arnalǵan mamandandyrylǵan kómekti ambýlatorıalyq kezeńde-aq qoljetimdi ete túsedi», — dedi ortalyqtyń ashylýynda basqarma basshysy Marat Pashımov.
MRT jáne ÝDZ-dan bólek, munda kolposkopıa men kardıotokografıany da jasaýǵa bolady. Sonymen qatar, bıyl ortalyqta kompúterlik tomograf ornatý josparlanýda.
Pasıentterge birden birneshe beıindi maman keńes beredi: akýsher-gınekologtar, genetık, terapevt, nevrolog jáne oftalmolog. Eń basty qolaılylyq — barlyq tekserýdi bir ǵımaratta ótýge bolady.
Jalpy alǵanda, ortalyqtyń ashylýy dárigerlerge kúrdeli júktiligi bar áıelderdiń jaǵdaıyn muqıat baqylaýǵa, kez kelgen patologıany ýaqytynda baıqaýǵa jáne bolashaq analardy mindetti gospıtalızasıasyz emdeýge kómektesedi.
Aıta ketý kerek, bul megapolıstegi qaýip tobyndaǵy júkti áıelderge arnalǵan ekinshi klınıkalyq-dıagnostıkalyq ortalyq. Birinshisi buryn Perınatologıa jáne balalar kardıohırýrgıasy ortalyǵynyń bazasynda ashylǵan bolatyn.
Buǵan deıin «Kýrsıv» Qazaqstanda uryqtyń damý aqaýlaryn anyqtaý 13%-ǵa óskenin, al náreste óliminiń kórsetkishi 15%-ǵa tómendegenin jazǵan edi.