Almaty Air Initiative qory Almatyda lastanǵan aýanyń adam aǵzasyna qalaı enetinin kórsetý úshin eksperıment ótkizdi. Qalany kezip serýendegen soń mıkroskoptan ne kóringenin Kursiv LifeStyle jazyp, infohub.kz saıty habarlady.
Zertteýge bes erikti qatysty. Olar tańerteń zerthanaǵa kelip, árqaısysynan alǵashqy qan úlgisi alyndy. Sodan keıin qatysýshylar Satpaev — Jarokov — Abaı — Rozybakıev aralyǵyndaǵy kóshelermen serýendeýge shyqty.
Eki erikti KN95 qorǵanysh respıratorlarymen júrdi, qalǵandary maskasyz boldy. Serýen barysynda dachık PM2,5 bólshekteriniń konsentrasıasyn 10–15 mkg/m³ deńgeıinde tirkedi.
Qaıtyp kelgen soń qatysýshylardan qaıta qan alynyp, ol jaryq mıkroskopymen zertteldi. Serýenge deıin úlgilerde aıqyn bógde elementter tabylmaǵan. Serýennen keıin respıratorsyz qatysýshylardyń jekelegen erıtrosıtterinde qara daqtar paıda boldy.
Qor jetekshisi Juldyz Sáýlebekovanyń aıtýynsha, aýanyń lastanýy syrtta ǵana qalmaıdy. Usaq bólshekter qan aǵymyna enip, onymen búkil aǵzaǵa tarala alady.
«Queen Mary University of London zertteýi men Almaty Air Initiative eksperımenti rastaıdy — adam kólik qozǵalysy qarqyndy joldyń janynda bolǵan soń qanynda paıda bolatyn kómirtegi men metal bar bólshekterdiń yqtımaldyǵy joǵary. Olar paıdalanylǵan gazdarǵa, tejegish pen shınanyń tozýyna tán», — dep jazady Almaty Air Initiative.
Buǵan deıin Kursiv LifeStyle Almaty aýasynyń jaı-kúıi memlekettik organdardyń nusqasy boıynsha basqa ólshemderden qanshalyqty ózgeshe ekenin jazǵan. Keıbir jaǵdaıda kórsetkishter arasyndaǵy aıyrma 27 esege jetedi.