Almatyda 54 jastaǵy er adam elektrosamokatpen júrip, jol-kólik oqıǵasynda qaza tapty. Aldyn ala derekterge qaraǵanda, ol Shyǵys aınalma avtojolymen shamamen 90 km/saǵ jyldamdyqpen kele jatqan, dep habarlaıdy infohub.kz saıty.
Apat túnde bolǵan. Beınebaqylaý kameralary men vıdeotirkegishterdiń kadrlarynda kóringendeı, samokat júrgizýshisi joldyń sol jaq shetimen kele jatyp, aldyndaǵy kólikti basyp ozýǵa bel býdy. Basyp ozý kezinde ol rólge ıe bola almaı, asfáltqa qulady. Soqqydan er adamnyń qorǵanysh dýlyǵasy ushyp ketti.
Oqıǵa ornyna polıseıler men jedel járdem keldi, alaıda zardap shekken adam alǵan jaraqatynan kóz jumdy. Oqıǵa faktisi boıynsha sotqa deıingi tergeý bastalyp, bolǵan jaıdyń barlyq mán-jaıy anyqtalýda.
Polısıanyń málimetinshe, jyl basynan beri Almatyda elektrosamokat qatysqan 91 jol-kólik oqıǵasy tirkelip, olarda 96 adam jaraqat alǵan.
Tamyz aıynyń sońynda «Kýrsıv» Varlamov kóshesinde elektrosamokattan qulaǵan 44 jastaǵy almatylyqtyń qaza tapqanyn jazǵan bolatyn. Sonymen qatar İİM dereginshe, 2026 jyldyń 8 aıynda Qazaqstanda elektrosamokat qatysqan 139 jol-kólik oqıǵasy tirkelip, olarda eki adam qaza tapty.
Polısıa elektrosamokattyń jol qozǵalysyna qatysýshy ekenin jáne ony paıdalaný erejelerdi saqtaýdy talap etetinin eske saldy.
Buǵan deıin Kýrsıv Avto 25 tamyzdan bastap samokattarǵa arnalǵan JQE-ge eleýli ózgerister kúshine engenin jazǵan edi.