Almatynyń Jetisý aýdanynda Esentaı ózeni boıymen Chernovıskaıa kóshesinen Samyrsynǵa deıingi aralyqta jaǵalaý qurylysy bastaldy. Jańa demalys aımaǵynyń uzyndyǵy 1200 metrdi quraıdy, dep habarlaıdy infohub.kz.
Qalalyq ákimdiktiń málimetinshe, joba aıasynda ózen arnasyn tazartý jáne serýen aımaǵyn jasaý josparlanǵan. Qoǵamdyq keńistik aýmaǵyna 3700 sharshy metr brýschatka tóselip, 230 sharshy metr avtoturaq jasalyp, 6850 sharshy metr kógaldandyrý jumystary júrgiziledi. Sondaı-aq uzyndyǵy 1,2 shaqyrym bolatyn 120 jaryq tireýi, 50 oryndyq pen qoqys jáshigi jáne eki yńǵaıly dárethana ornatylady.
Demalys aımaǵyn qurýǵa erekshe kóńil bólingen: munda balalar men sport alańdary, skeıt alańy jáne jaıaý júrginshiler joldary paıda bolady. Balalarǵa arnalǵan átkenshek, syrǵanaq jáne órmeleý qurylǵylary motorıka men dene belsendiligin damytýǵa yqpal etedi.
Kópir ótkelderin qaıta jańartý jaıaý júrginshiler men velosıpedshiler úshin qaýipsizdik pen qoljetimdilikti qamtamasyz etedi: trotýarlar men velojoldar salynyp, avtomatty sýarý júıesi ornatylady.
«Jańa qoǵamdyq keńistik ózen jaǵalaýyn qala ishindegi biregeı tabıǵı saıabaqqa aınaldyrady. Qurylys jumystary 2024 jyldyń ekinshi toqsanynyń sońyna deıin aıaqtalady», — dedi qalalyq ákimdikte.
Buǵan deıin Almaty ákimi Erbolat Dosaev Esentaı ózeninde jaǵalaý salý týraly aıtyp, jumystardy maýsym aıynyń sońyna deıin aıaqtaýdy tapsyrǵan bolatyn. Sondaı-aq, Naýryzbaı aýdanynda uzyndyǵy 7,7 shaqyrym bolatyn Qarǵaly ózeniniń jaǵalaýyn qaıta jańartý bastaldy.