Almatynyń Medeý aýdanynda polıseıler patrúlden qashyp, qýǵyn barysynda ishinde esirtki bar sómkeni tastap ketken er adamdy ustady. İshindegi zat, boljam boıynsha, marıhýana. Ustalǵan adamnyń ózi qara naryqtaǵy qunyn shamamen 500 mln teńge dep baǵalaǵan, dep habarlaıdy infohub.kz saıty.
Oqıǵa Kereı–Jánibek handar kóshesinde bolǵan. «Býran-613» ekıpajynyń patrúlderi jeke sektorda kúdikti jas jigitti baıqaǵan.
Polıseılerdi kórgen ol kenet baǵytyn ózgertip, qashýǵa tyrysqan. Júgirip bara jatyp kıimin sheship tastaı bastaǵan, sondaı-aq sómkesinen de qutylǵan.
«Patrúlder ony qashyryp jibermedi. Er adam qorshaýǵa alynyp, ustaldy», — dep habarlady polısıada.
Laqtyrylǵan sómkeden ózine tán ıisi bar ósimdik tektes zattyń iri partıasy tabyldy. Aldyn ala derekter boıynsha, bul marıhýana bolýy múmkin. Tárkilengen zattyń naqty quramy men salmaǵyn sot-hımıalyq saraptama anyqtaıdy.
Quqyq qorǵaý organdarynyń málimetinshe, ustalǵan adam esirtkini odan ári taratýǵa arnalǵanyn aldyn ala moıyndaǵan. Onyń qara naryqtaǵy boljamdy qunyn shamamen 500 mln teńge dep baǵalaǵan.
Oqıǵa ornyna Medeý aýdany polısıa basqarmasynyń qyzmetkerleri men tergeý-jedel toby keldi. Zat tárkilenip, saraptamaǵa jiberildi. Bolǵan jaıt boıynsha sotqa deıingi tergeý bastaldy.