26 jastaǵy Aleksandr Artýkov Almatydaǵy №4 qalalyq klınıkalyq aýrýhananyń kúıik bóliminde bir aı boıy ómir úshin kúresten keıin úıine oralýda. Gaz balony jarylǵanda ol aýyr termıalyq kúıik jáne barotravma alǵan. Bul týraly infohub.kz saıty habarlaıdy.

Dárigerlerdiń aıtýynsha, er adamnyń úı aýlasyndaǵy qorada gaz balony jarylǵan. Zardap shekken adam aýyr kúıikpen aýrýhananyń qabyldaý bólimine jetkizilgen. «Pasıentke barotravma, denesiniń 89%-iniń termıalyq kúıigi, onyń 15%-i tereń kúıik, sondaı-aq sol qolynyń aýyr jaraqaty — jumsaq tinderiniń keń zaqymdanýy dıagnozy qoıyldy. Aýrýhanaǵa túsken alǵashqy mınýttarda dárigerler qarqyndy shokqa qarsy terapıany bastady», — delingen habarlamada.

Sol kúni Aleksandrǵa zaqymdalǵan qoldy qalpyna keltirý úshin shuǵyl ota jasaldy. Kelesi aptalarda em kúıik bóliminde jalǵasty. Densaýlyq saqtaý mınıstrliginiń málimetinshe, pasıent birneshe hırýrgıalyq em kezeńinen ótti, sonyń ishinde teri aýystyrý (aýtodermoplastıka) jáne zaqymdalǵan aıaq-qolǵa rekonstrýktıvtik otalar. Osy ýaqyt boıy dárigerler kún saıyn ómirlik mańyzdy organdardyń jumysyn, aspaptyq-zerthanalyq kórsetkishterdi baqylap, naýqastyń jaǵdaıyna qaraı emdi túzetip otyrdy.

«Pasıent bizge óte aýyr jaǵdaıda keldi. Tórt táýlik boıy reanımasıada jatty, jaǵdaıy turaqtaǵannan keıin kúıik bólimine aýystyryldy. Mundaı aýmaqtaǵy kúıik — árqashan dárigerler úshin eń kúrdeli synaqtardyń biri. Klınıkanyń kópsalaly komandasynyń úılesimdi jumysynyń arqasynda naýqastyń ómirin saqtap qaldyq», — dedi kúıik bóliminiń meńgerýshisi Eldos Álmenov.

Aleksandr Artýkov em kezinde kómek pen qoldaý kórsetken dárigerler men medısına qyzmetkerlerine alǵys bildirdi. Onyń aıtýynsha, dáriger-kardıologtar, terapevter, travmatologtardyń arqasynda em óte jaqsy ótken. «Barlyq prosedýralar kásibı túrde jáne is júzinde aýyrtpalyqsyz uıymdastyryldy. Maǵan tek fızıkalyq emes, sonymen qatar emosıonaldyq qoldaý da kórsetti, óıtkeni mundaı jaraqattardy jeńý óte qıyn. Barlyq medısına qyzmetkerlerine — sanıtarlarǵa, medbıkelerge, dárigerlerge, anestezıologtarǵa úlken rahmet aıtqym keledi. Kásibılikterińiz úshin barlyǵyńyzǵa óte rızamyn», — dedi naýqas. Alda Aleksandrdy uzaq ýaqyt reabılıtasıa kútip tur.