Almatyda M. Esbolatov atyndaǵy İshki ister mınıstrligi akademıasynyń birinshi kýrs kýrsanttary saltanatty túrde ant qabyldady. Bıyl vedimistik oqý ornyna 300-den astam kýrsant qabyldandy. Olar úshin ant qabyldaý kásibı joldyń bastalýynyń jáne ishki ister organdarynda qyzmet etýge daıyndyqtyń mańyzdy kezeńine aınaldy, dep habarlaıdy infohub.kz saıty.
Saltanatty sharaǵa İshki ister mınıstrliginiń basshylyǵy, Generaldar keńesiniń tolyq quramy, quqyq qorǵaý organdarynyń ardagerleri, akademıanyń basshylyǵy men jeke quramy, sondaı-aq kýrsanttardyń ata-analary men jaqyndary qatysty.
Ant qabyldaǵanǵa deıin kýrsanttar birneshe apta boıy oqý-dala jıyndarynan ótti. Osy ýaqyt ishinde olar kún tártibine beıimdelip, saptyq jáne dene daıyndyǵynan, taktıka jáne basqa da baǵyttar boıynsha sabaqtardan ótti. Oqý-dala jıyndary vedimistik oqý ornyndaǵy odan ári oqýǵa daıyndyqtyń bastapqy kezeńi boldy.
Saltanat barysynda kýrsanttar Qazaqstan Respýblıkasyna adal bolýǵa, Konstıtýsıa men zańnamany saqtaýǵa, azamattardyń quqyqtary men bostandyqtaryn qorǵaýǵa, sondaı-aq ishki ister organdary qyzmetkeriniń mindetterin abyroımen atqarýǵa saltanatty túrde ant etti.
Kýrsanttarǵa quqyq qorǵaý júıesiniń ardagerleri men akademıa basshylyǵy aq tilekterin arnady. Olar kýrsanttardy ant qabyldaýymen quttyqtap, tańdaǵan kásiptiń erekshe jaýapkershiligin atap ótti.
«Búgin sizder ishki ister organdarynda qyzmet etý jolyndaǵy mańyzdy kezeńnen óttińizder. Ant — bul jaı ǵana saltanatty sózder emes, óz isterińizben, tártippen, bilimmen jáne qyzmetke jaýapkershilikpen qaraýmen rastaýǵa tıis mindetteme», — dedi İİM akademıasynyń bastyǵy, polısıa polkovnıgi Qalıjan Qoblandın.
Bul kún kýrsanttardyń ata-analary men jaqyndary úshin de erekshe mańyzǵa ıe boldy. Olar balalarynyń ant qabyldaýyna kýá bolyp, osy mańyzdy sátti birge bólisti.
Kýrsanttardy alda oqý jyldary, kásibı daıyndyq, sondaı-aq ishki ister organdaryndaǵy odan ári qyzmetke qajetti bilim men daǵdylardy meńgerý kútip tur. Ant qabyldaý olardyń kásibı qalyptasýyndaǵy mańyzdy beles jáne ishki ister organdary qataryndaǵy qyzmetke daıyndyqtyń jańa kezeńiniń bastaýy boldy.