Almatyda áleýmettik jelide taraǵan beınejazbadan keıin polısıa qyzmetkerleri tekserý júrgizip jatyr. Kadrlarda áıel júrginshimen janjaldasyp, oǵan óz ıtin laqtyrǵan, dep habarlaıdy infohub.kz saıty.
«Krımınalnyı Kazahstan» Telegram-arnasynyń málimetinshe, Almatydaǵy №52 avtobýstyń jolaýshylary ıtke qatygezdik tanytqan, bylapyt sóılep, «fas» dep buıryq bergen áıeldi beınege túsirip alǵan.
Keıin, kýágerlerdiń aıtýynsha, ol kóshede ıtti tunshyqtyryp, tepken. Júrginshiler jaǵdaıǵa aralasýǵa tyrysqan. Sonda áıel janýardy olarǵa qaraı laqtyra bastaǵan. Alaıda júrginshiler ıtti alyp qala alǵan.
«Birneshe jigit ıtti áıelden tartyp aldy. Olar ony tamaqtandyryp, veterınarǵa apardy, qazir janýarǵa jańa úı izdep júr», — delingen jarıalanymda.
Almaty polısıa departamentiniń baspasóz qyzmeti NUR.KZ tilshisine áleýmettik jelide taraǵan beınejazba boıynsha Aýezov aýdanynyń polıseıleri tekserý júrgizip jatqanyn málimdedi.
«Kadrlarda qolyndaǵy ıtti júrginshimen janjal kezinde paıdalanǵan áıeldiń áreketteri tirkelgen. Osyǵan baılanysty oqıǵaǵa qatysýshylardyń jeke basy men bolǵan jaǵdaıdyń barlyq mán-jaıy, sonyń ishinde janýarǵa qatysty áreketter anyqtalyp jatyr», — dedi vedomstvoda.
Tekserý qorytyndysy boıynsha áıeldiń áreketterine qatań quqyqtyq baǵa berilip, tıisti prosestik sheshim qabyldanady, dep ýáde etti tártip saqshylary.
«Janýarlarǵa mundaı qarym-qatynasqa jol berilmeıdi. Ár adam olarǵa adamgershilikpen jáne jaýapkershilikpen qaraýǵa, olarǵa azap nemese zıan keltirýi múmkin áreketterge jol bermeýge mindetti», — dep shaqyrdy polıseıler.
Nazar aýdaryńyz, beınejazbada bylapyt sózder bar!