Almatyda túnde ál-Farabı atyndaǵy Qazaq ulttyq ýnıversıtetiniń Stýdentter saraıy ǵımaratynyń shatyry qulady. Megapolıs ákimdiginiń baspasóz qyzmeti bul — nysandy rekonstrýksıalaý aıasyndaǵy josparly demontaj, tótenshe jaǵdaı emes dep túsindirdi, dep habarlaıdy infohub.kz saıty.
Oqıǵa týraly alǵashqylardyń biri bolyp Almaty turǵyndary habarlady: olar áleýmettik jelilerde túnde qaladaǵy Stýdentter saraıynyń shatyry qulaǵany týraly aqparatpen bólise bastady. Keıinirek ál-Farabı atyndaǵy QazUÝ baspasóz qyzmeti nysan rekonstrýksıada ekenin málimdedi.
Bastapqyda shatyrdyń ǵımaratty josparly rekonstrýksıalaý jumystarynyń nátıjesinde qulaǵany, álde tótenshe jaǵdaı bolǵany belgisiz edi. Ýnıversıtettiń qosymsha túsiniktemesin NUR.KZ tilshisine Almaty ákimdigi berdi.
«2026 jylǵy 23 qyrkúıekte túnde Ý.A. Joldasbekov atyndaǵy Stýdentter saraıy ǵımaratynyń shatyryn josparly demontajdaý jumystary júrgizildi. Qaýipsizdikti qamtamasyz etý jáne oqý prosesine kedergi jasamaý úshin barlyq jumys túnde atqaryldy. Merdigerler qaýipsizdik sharalaryn tolyq saqtady. Zardap shekkender joq», — delingen habarlamada.