Almatydaǵy Ortalyq qalalyq klınıkalyq aýrýhananyń oftalmologtary keratokonýsy IV dárejeli 33 jastaǵy qazaqstandyqqa donorlyq qasań qabyq (rogovısa) kóshirip, kózin saqtap qaldy. Ota naýqastyń kórý qabiletiniń odan ári nasharlaýyn toqtatýǵa múmkindik berdi, dep habarlaıdy infohub.kz saıty.
Dárigerlerdiń aıtýynsha, aýrý tez órship, naýqastyń kórýi aıtarlyqtaı nasharlaǵan. Sondyqtan qasań qabyqty kóshirý qajettiligi týyndaǵan.
Kúrdeli otany aýrýhananyń oftalmologıa bóliminiń meńgerýshisi Gúlzat Abdraımova jasady. Nátıjesinde kózdi saqtap qalý múmkin boldy.
Bes aıdan keıin er adam josparly tekserýge keldi. Tekserý otadan keıingi qalpyna kelýdiń jaqsy ótkenin kórsetti. Tekserýden soń qazaqstandyq dárigerge jáne búkil medısınalyq topqa kórsetilgen sapaly kómegi úshin alǵys aıtty.
Óz kezeginde Abdraımova ár otanyń artynda adam taǵdyry turatynyn atap ótti. Jastardyń kórý qabiletin saqtap qalýǵa kómektesý — óte mańyzdy, óıtkeni bul adamǵa tolyqqandy ómir súrýge, oqýǵa jáne jumys isteýge múmkindik beredi.
Qasań qabyqty kóshirý — kózge jasalatyn eń kúrdeli ota. Ony tek tájirıbeli hırýrgter ozyq jabdyqta jasaı alady. Otadan keıin kózdiń sátti qalpyna kelýi úshin naýqasty uzaq ári muqıat baqylaý qajet.
Buǵan deıin «Kýrsıv» Almatydaǵy dárigerler ondaǵan magnıt jutyp qoıǵan úsh balany bir aýysymda ota jasaǵanyn jazǵan bolatyn.
Odan buryn «menıngoradıkýlosele» dıagnozymen dúnıege kelgen nárestege mańǵystaýlyq hırýrgter kúrdeli neırohırýrgıalyq ota jasaǵany habarlanǵan. Óńirde mundaı ota alǵash ret jasaldy.
Sonymen qatar Óskemende birneshe kún buryn neırohırýrgıalyq robotty qoldanyp, alǵashqy sátti ota jasaldy.