Almatyda ustalǵan kólikterdi evakýasıalaý men saqtaýǵa biryńǵaı tarıf belgileý usynyldy. Tıisti sheshim jobasy qalalyq máslıhat depýtattarynyń qaraýyna engizildi, dep habarlaıdy infohub.kz saıty.
Bul tek Ákimshilik quqyq buzýshylyq týraly kodekste kózdelgen jaǵdaılarda ustalyp, komýnaldyq arnaıy turaqtarǵa jetkizilgen kólik quraldaryna qatysty.
«Bul barlyq evakýasıa jaǵdaılaryna qatysty emes ekenin túsiný mańyzdy. Usynylyp otyrǵan tártip tek kólik quraly ákimshilik quqyq buzýshylyq týraly zańnamaǵa sáıkes ustalyp, arnaıy turaqqa jetkizilgende ǵana qoldanylady», — dedi Erjan Dıhanbaev.
Uqsas tásil Almatynyń jol qozǵalysyn uıymdastyrý qaǵıdalarynda bekitilgen, onda evakýasıa dep ÁQBtK boıynsha ustalǵan kólik quralyn arnaıy alańǵa nemese turaqqa májbúrlep jyljytý tanylady.
«Jobada kólik quralynyń sanatyna qaramastan evakýasıanyń biryńǵaı qunyn — 3 AEK belgileý usynylady. Mundaı tásil esepteý tártibin birizdi jáne avtokólik ıelerine túsinikti etedi. Sonymen qatar kólikti ýaqytsha saqtaý úshin avtokólik ıesine qosymsha shyǵyndardan jaltarýǵa nemese olardy azaıtýǵa múmkindik beretin jeke tártip kózdelgen», — delingen habarlamada.
Buǵan deıin, 30 shildede Almaty qalasynyń máslıhaty jol qozǵalysy qaǵıdalarynda rettelmegen bóliginde ákimshilik quqyq buzýshylyqtar boıynsha ustalǵan kólik quraldaryn jetkizý jáne saqtaý tártibin aıqyndaıtyn jol qozǵalysyn uıymdastyrý qaǵıdalaryn bekitti.
Eger ıesi kóligin evakýasıalanǵan kúni saǵat 18:00-ge deıin arnaıy turaqtan alyp ketse, saqtaý úshin tólem eseptelmeıdi. Osylaısha, kólik quralyn ýaqtyly alǵan jaǵdaıda avtokólik ıesi tek evakýasıa úshin tóleıdi.
«Eger kólik saǵat 18:00-den keıin arnaıy turaqta qalsa, saqtaý quny kólik quralynyń sanatyna baılanysty esepteledi. Bul rette jobada alǵashqy táýlik úshin keıingi saqtaý táýlikterimen salystyrǵanda tómendetilgen mólsherleme qarastyrylǵan. Máselen, jeńil kólikter úshin alǵashqy táýlikke 2,5 AEK, al árbir kelesi táýlikke 5 AEK mólsherinde tólem belgileý usynylady. Basqa sanattaǵy kólik quraldary úshin de tólem mólsheri olardyń túri men sıpattamalaryna qaraı saralanǵan», — dep qosty ákimdikte.
Joba zańnamada kózdelgen qaraý rásimderinen ótip, qajetti oń qorytyndylardy alǵany habarlanady.
Buǵan deıin Almatynyń komýnaldyq turaqtary úshin kólik júktemesin eskeretin jańa tarıfteý júıesi usynylǵanyn jazǵan bolatynbyz.