Almatydaǵy komýnaldyq qyzmet qyzmetkerleriniń shóp ústinde demalyp jatqanyn kórsetetin vıdeo áleýmettik jelilerde qyzý talqyǵa tústi. Vıdeo avtory áıelderdi jumys istemeıdi dep aıyptady, alaıda olardyń zańdy túski úziliste bolǵany anyqtaldy, dep habarlaıdy infohub.kz saıty.
Oqıǵa 22 tamyzda saǵat 13:10 shamasynda Maılın kóshesindegi aleıada bolǵan. Túrksib aýdanynyń «Almaty tazalyq» MKK qyzmetkerleri 12:00-den 14:00-ge deıin sozylatyn túski úzilis kezinde demalǵan. Almaty ákimdiginiń túsindirýinshe, kásiporynnyń óndiristik personaly táýlik boıy úsh aýysymmen jumys isteıdi, ár aýysymǵa eki saǵattyq eki úzilis qarastyrylǵan: kúndizgi (12:00-den 14:00-ge deıin) jáne túngi (00:00-den 02:00-ge deıin).
Arandatýshylyq túsirilimge baılanysty MKK qyzmetkerleri 23 tamyzda Túrksib aýdanynyń polısıa basqarmasyna aryzdanǵan. Áıeldiń jeke basy anyqtaldy. Onyń áreketterinen usaq buzaqylyq belgileri baıqalǵan, osyǵan baılanysty QR ÁQBtK-niń 434-babynyń 1-bóligi boıynsha hattama jasalǵan. Materıaldar prosesýaldyq sheshim qabyldaý úshin Almaty qalasynyń mamandandyrylǵan ákimshilik sotyna jiberildi.
Sonymen qatar, tekserý barysynda áıeldiń ıtin tumyldyryqsyz serýendetkeni anyqtaldy. Janýarlarǵa jaýapkershilikpen qaraý salasyndaǵy zańnama talaptaryn buzǵany úshin ol QR ÁQBtK-niń 407-2-babynyń 1-bóligi boıynsha ákimshilik jaýapkershilikke tartyldy. Oǵan 10 AEK mólsherinde, ıaǵnı 43 250 teńge aıyppul salyndy.