Almatyda kámeletke tolmaǵan qyzdy uryp-soqqan qatygez vıdeo jelide tarady. Polısıa qylmystyq is qozǵaǵanyn málimdedi, dep habarlaıdy infohub.kz.
Telegram-kanaly HALYQSTAN-da qatygez qorlyq túsirilgen vıdeo jarıalandy. Bir top qyz qurbysynyń betinen uryp, shashynan tartyp, qorlap, tizerletip, bárin vıdeoǵa túsirip alǵany habarlanady.
Jarıalanymda uryp-soǵýǵa qatysýshylardyń biri – kámeletke tolmaǵan qyz – jazbany áleýmettik jelilerde jarıalaǵany aıtylady. Keıin vıdeo joıylǵanymen, polısıa qyzmetkerleri ony sol ýaqytta zerttep úlgergen.
Tilshi Almaty polısıa departamentine túsinikteme suraǵan. Ol jerde vıdeodan bir top jasóspirimniń kámeletke tolmaǵan qyzǵa qatysty quqyqqa qarsy áreketteri túsirilgeni aıtyldy. Osy fakti boıynsha qylmystyq is tergelýde.
«Qazirgi tańda oqıǵanyń barlyq qatysýshylary anyqtaldy. Bolǵan oqıǵanyń barlyq mán-jaıyn jan-jaqty, tolyq jáne obektıvti túrde anyqtaýǵa baǵyttalǵan qajetti tergeý áreketteri júrgizilýde», — dep naqtylady polısıadan.
Tergeý barysy Almaty polısıa departamenti basshylyǵynyń baqylaýynda ekeni atap ótiledi.