Almatydaǵy «Selınnyı» zamanaýı mádenıet ortalyǵynda 15 qazanda «Himoya: Áıeldik qýat, qasıetti baılanystar» atty halyqaralyq kórme ashylady. infohub.kz saıtynyń habarlaýynsha, joba Ortalyq Azıa men ózge óńirlerden kelgen 21 sýretshini biriktiredi.
Qatysýshylar kórmege arnaıy jasalǵan jańa týyndylarmen qatar burynnan bar shyǵarmalaryn da usynady. Negizgi taqyryp — áıeldiń estelik pen týystyq jelisi.
Týyndylarda sopylyq jáne zoroastrlyq tájirıbeler, shamandyq dástúrler, táńirshildik jáne kóne túrkilik dúnıetanym sóz bolady. Sondaı-aq óńirlerdegi tilderdiń, ǵuryptardyń jáne jergilikti dástúrlerdiń joıylýyna erekshe kóńil bólinedi.
«Himoya ónerdiń ózindik tanym, batyl baıandaý, tujyrym jáne estelik tájirıbelerin qalaı qalyptastyratynyn zertteıdi; kórkemdik tájirıbe munda patrıarhaldyq zorlyq pen álemdik ústemdik gegemonıasy dáýirindegi tumar men paıǵambarlyq qorǵanys retinde kórinedi», — dep sıpattaıdy kórmeni ortalyqta.
Jobanyń kýratory — Kvandjý men Shardja bıennaleleri sıaqty iri halyqaralyq alańdardaǵy jobalardy basqarǵan úndistandyq zertteýshi Natasha Djınvala. Kórmeniń arhıtektýrasy men senografıasyn Diogo Passarinho Studio ázirlegen. Qazaqstannan qatysýshylar qatarynda Almagúl Meńlibaeva, Nara Beıbit jáne Elaman Muqtarhan bar.
«Himoya: Áıeldik qýat, qasıetti baılanystar» kórmesi «Selınnyıda» 2026 jylǵy 15 qazannan 2027 jylǵy 4 sáýirge deıin jumys isteıdi.
Buǵan deıin Kursiv LifeStyle Almatyda óner festıvali ótip jatqanyn jazǵan edi.