Almatyda jas jigit taspen jumys istep jatqanda kózine aýyr jaraqat aldy: joǵary jyldamdyqpen ushqan synyq birneshe qabyqty tesip, kózdiń tereńine kirip ketti. Oftalmologtar kúrdeli kóp kezeńdi ota jasap, bógde zatty alyp shyqty, dep habarlaıdy infohub.kz saıty.
NUR.KZ-niń málimetinshe, jas jigit balǵamen tasty usaqtap jatqanda, synyqtyń biri kózine tıgen. Bógde zat qasań qabyqty, kóz burshaǵyn, nurly qabyqty jáne kózdiń tereń qurylymdaryn zaqymdaǵan.
«Oftalmologtarǵa kúrdeli ári názik jumys turdy: jaraqat óte aýyr boldy — qasań qabyq, kóz burshaǵy, nurly qabyq jáne kózdiń tereń qurylymdary zaqymdanǵan», — delingen habarlamada.
Dárigerler zaqymdanǵan qurylymdardy kezeń-kezeńimen qalpyna keltirip, kózdi jáne múmkindiginshe kórý qabiletin saqtap qalýǵa tyrysty.
«Jaraqat óte aýyr boldy: tas synyǵy kózdiń tereńine kirip ketti. Biz kúrdeli kóp kezeńdi ota jasadyq: qasań qabyqty tiktik, jaraqattyq kataraktany alyp tastadyq, kóz burshaǵyn bekittik, nurly qabyqty plasıkalap, vıtrektomıa jasadyq. Ota barysynda synyqty taýyp, alyp tastadyq, sodan keıin kóz qurylymyn saqtaý úshin sılıkon maıyn engizdik», — dedi oftalmologıa bólimshesiniń meńgerýshisi Gúlzat Abdraımova.
Almaty qalalyq qoǵamdyq densaýlyq saqtaý basqarmasy bul oqıǵa taspen jáne basqa da qatty materıaldarmen jumys istegende kóz jaraqaty qanshalyqty qaýipti bolýy múmkin ekenin taǵy bir dáleldegenin atap ótti.
«Mundaı jumystar kezinde qorǵanysh kózildirik kıý qajet», — dep qosty basqarmada.