Almatyda jetkizý qyzmetiniń kýreri tún ortasynda kómek suraǵan aıqaıdy estip, oqıǵaǵa aralasyp, áıelge qatysty aýyr qylmystyń aldyn aldy, dep habarlaıdy infohub.kz.
Oqıǵa ótken túni saǵat 02:30 shamasynda Medeý aýdanyndaǵy turǵyn úı kesheniniń birinde bolǵan. Polısıa málimetinshe, kýrer tapsyrysty oryndap, kireberisten shyǵyp bara jatqanda, kúzet bólmesinen áıeldiń aıqaıy estiledi. Ol eki oılanbastan oqıǵaǵa aralasyp, áıelge qatysty zańsyz áreketti toqtatqan, sodan keıin patrúldik ekıpajdy shaqyrtqan.
Oqıǵa ornyna kelgen polıseıler kúdiktini ustap, Medeý aýdandyq polısıa basqarmasyna jetkizgen. «Kýágerdiń ýaqtyly aralasýynyń arqasynda qylmystyq nıet sońyna deıin júzege aspady. Osy fakti boıynsha sotqa deıingi tergeý bastaldy. Oqıǵanyń mán-jaıy anyqtalyp jatyr», — delingen polısıa habarlamasynda.
Polısıa azamattardyń beı-jaı qaramaýy aýyr qylmystardyń aldyn alýǵa jıi kómektesetinin atap ótip, osyndaı jaǵdaılarda dereý 102 telefonyna habarlasýǵa shaqyrdy.
Buǵan deıin Kursiv LifeStyle qazaqstandyq bloger Arman Ál-Amınniń qarjylyq qıyndyqtar kezinde júzdegen myń jazylýshysy bola tura, jetkizý qyzmetinde kýrer bolyp jumys istegenin moıyndaǵanyn jazǵan. Onyń «jaman jumys joq» degen áńgimesi áleýmettik jelilerde keń rezonans týdyryp, kóptegen qoldaý sózderin jınaǵan.