Almatyda qala turǵyndary taǵy da betonmen qaptalǵan aǵashtardy baıqady — bul joly Kurmanǵazy kóshesinde jasyl jelekterdiń tamyry beton qabatynyń astynda qaldy, dep habarlaıdy infohub.kz saıty.
Abylaı han dańǵyly men Panfılov kóshesiniń aralyǵynda qazir abattandyrý jáne gastronomıalyq kóshe uıymdastyrý jumystary júrip jatyr. Áleýmettik jelilerde jaıaý júrginshi jolynyń sheti betonmen quıylyp, qasyndaǵy aǵashtardyń tamyry sýǵa batqan beınejazba paıda boldy. Beınejazba Denıs Ten eskertkishi ornatylǵan skverdiń qarsy betinde túsirilgen.
Beınejazba jarıalanǵannan keıin ákimdikke kóptegen shaǵym men aıyptaý kelip tústi. Mundaı jaǵdaılar sońǵy bir jylda qalada birneshe ret tirkelgen. Almaly aýdany ákimdiginde bul ýchaskede tik quldılaýǵa baılanysty jasyl aımaqtyń deńgeıin kóterip jatqanyn túsindirdi. Olardyń aıtýynsha, quıylǵan betonnan tiri ósimdikterdiń eshqaısysy zardap shekpegen.
«Jelide taralyp jatqan beınematerıaldarǵa qatysty aıtamyz: kadrlarda túsirilgen nysan — shamamen eki jyl buryn kesilgen aǵashtyń túbiri. Aǵymdaǵy jumystar barysynda tiri kópjyldyq jasyl jelekter zaqymdalǵan joq», — dep jazdy ákimdikte.
Sonymen qatar, merdiger qurylys jumystaryn júrgizý kezindegi buzýshylyqtar men aýmaqty tıisti deńgeıde ustamaǵany úshin aıyppul arqalady. Vedomstvo jasyl aımaqty qalpyna keltirip, jańa butalar otyrǵyzýǵa ýáde berdi.
Eske salaıyq, Almatynyń alǵashqy gastronomıalyq kóshesi týraly aqpan aıynda aıtyla bastaǵan. Ákimdiktiń jospary boıynsha, Kurmanǵazy kóshesinde «sapaly qalalyq serýendeý alańy jáne turǵyndar men qonaqtar úshin tartymdy núkte» paıda bolady.
Buǵan deıin Kursiv LifeStyle Masanchı gastronomıalyq kóshesiniń qandaı bolatynyn kórsetken.