Almatyda qurylys salasyna baqylaý kúsheıtildi. Tekserý qorytyndysy boıynsha tórt qurylys kompanıasy lısenzıasynan aıyrylsa, 350 uıymnyń lısenzıasy ýaqytsha toqtatyldy, dep habarlaıdy infohub.kz saıty.
Almaty ákimdiginiń málimetinshe, qurylys salasyndaǵy baqylaý qala ákimi Darhan Satybaldynyń tapsyrmasy boıynsha kúsheıtilgen. Áleýmettik nysandardy jobalaý jáne salýmen aınalysatyn kompanıalarǵa erekshe nazar aýdaryldy.
«Baqylaý is-sharalarynyń qorytyndysy boıynsha tórt qurylys kompanıasy lısenzıasynan aıyryldy, taǵy 350 kompanıanyń lısenzıasy toqtatyldy. Qurylys qyzmetiniń 437 sýbektisine qatysty sharalar qabyldandy», — delingen ákimdik habarlamasynda.
«SK BEST Spec Story KZ» JSHS jobalaýǵa arnalǵan I sanatty memlekettik lısenzıasynan aıyryldy. Sondaı-aq «Otaý-Qurmet» JSHS jáne «QazǴZISA» AQ «DO» JSHS lısenzıasynan aıyryldy. «Sáýlet Qurylys Konsaltıńi» JSHS-niń lısenzıasynyń bir kishi túri joıyldy.
Ákimdikte qurylys jobalaryn iske asyrýǵa belgilengen talaptardy saqtaı alatyn jáne qurylys sapasyn qamtamasyz ete alatyn kompanıalar ǵana jiberiletinin atap ótti.
Buǵan deıin «Kýrsıv» 2025 jyldyń qorytyndysy boıynsha Astana ákimdigine qarasty LRT qurylys dıreksıasy 62,4 mln teńge kóleminde shyǵynǵa ushyraǵanyn jazǵan edi — bul bir jyl burynǵydan bes ese derlik kóp. Kompanıa jobaǵa tehnıkalyq qoldaý kórsetip, jeńil relsti kólik jelisiniń jobalaýy men qurylysyn baqylaǵan jáne LRT paıdalanýǵa berilgenshe jumysyn jalǵastyrady.