Jeńil relsti kólik (LRT) jelisin tartý kezinde Almatyda jumysshylar asfált astynda ondaǵan jyldar boıy jasyrylǵan tramvaı relsterin tapty. Jýrnalıs ári ólketanýshy Konstantın Kozlov bul oljany baıqap, habarlaǵan, dep habarlaıdy infohub.kz.
Kozlovtyń aıtýynsha, relster Tóle bı kóshesiniń Jeltoqsan men Abylaı han kósheleri aralyǵynda ornalasqan. 1930-shy jyldardan 1960-shy jyldarǵa deıin bul jerde tramvaı jelisi bolǵan. «Bul – naǵyz tarıhı artefakt. Qansha jyl boıy asfált pen topyraq astynda jatty», – dep atap ótti ólketanýshy. Ol sózin rastaý úshin osy ýchaskede tramvaılar júrgen muraǵattyq sýretterdi de keltirdi.
Jarıalanǵan kadrlardan jol tósemi alynǵannan keıin eski relsterdiń kóringeni baıqalady. Alaıda, avtordyń aıtýynsha, 15 shilde kúni túske taman olardy bólshektegen.
Bul olja áleýmettik jelilerde qyzý reaksıa týdyrdy. Almatylyqtar qalanyń burynǵy tramvaı jelisin eske alyp, keıbireýler relsterdi tarıhtyń bir bóligi retinde saqtap qalýdy usyndy. «Bul eski relster óte berik qorytpadan jasalǵan», «Ótken joǵary damyǵan órkenıettiń artefaktileri», «Qansha samýraı qylyshyn jasaýǵa bolady», «Olardy balqytyp, jańa rels dep beredi. Al búdjetten aqshany qaltaǵa basady», – dep jazady paıdalanýshylar.
Buǵan deıin Almaty bıligi LRT-tiń birinshi jelisin 2027 jyldyń sońyna qaraı iske qosýdy josparlap otyrǵany habarlanǵan bolatyn. Al bastapqyda joba 2029 jyldyń ekinshi toqsanyna ǵana josparlanǵan edi.