Almaty qalalyq máslıhatynyń kezekti sesıasynda Tóle bı kóshesindegi jeńil relsti kólik (LRT) qurylysynyń naqty merzimderi aıtyldy, dep habarlaıdy infohub.kz saıty.
Jınalys barysynda usynylǵan aqparatqa sáıkes, Tóle bı kóshesindegi LRT jobasy aıasyndaǵy qurylys jumystaryn qarasha aıynyń sońyna deıin aıaqtaý josparlanyp otyr. Al birinshi jeliniń birinshi kezeńin tolyǵymen kelesi jyldyń jeltoqsanynda bitirý kózdelgen.
Máslıhat sesıasynda LRT qurylysynyń qarqyny týraly máseleni depýtat Beıbit Qusaıynov kóterdi. Onyń aıtýynsha, turǵyndar Tóle bı kóshesiniń keıbir ýchaskeleri jabylǵanyn, alaıda qurylys jumystary barlyq jerde birdeı júrgizilmegenin aıtyp shaǵymdanady.
— Áleýmettik jelilerde turǵyndar Tóle bı kóshesiniń jekelegen ýchaskelerinde qurylys bastalǵanyn, biraq keıbir jabyq ýchaskelerde jumysshylar men tehnıkanyń jetkiliksiz ekenin aıtyp shaǵymdanyp júr. Jumystar qashan aıaqtalyp, bul ýchaskeler qandaı merzimde ashylady? — dep surady depýtat.
Ol sondaı-aq uzyndyǵy shamamen 18 shaqyrym bolatyn jobanyń birinshi kezeńiniń aıaqtalý merzimine qyzyǵýshylyq tanytty.
Jol ınfraqurylymyn damytý basqarmasynyń basshysy Oljas Shabdanov uzyndyǵy 18,3 shaqyrym bolatyn LRT birinshi jelisiniń birinshi kezeńiniń qurylysy kestege sáıkes jalǵasyp jatqanyn málimdedi. Onyń aıtýynsha, qazir nysanda 80-ge jýyq jumysshy men 50-den astam qurylys tehnıkasy jumyldyrylǵan.
Qurylystyń negizgi kezeńderiniń biri — ınjenerlik jelilerdi shyǵarý. Joba boıynsha barlyǵy 282 ınjenerlik komýnıkasıa qıylysyn qaıta jabdyqtaý qarastyrylǵan. Búgingi tańda onyń 90-y boıynsha jumystar aıaqtaldy.
— Injenerlik jelilerdi shyǵarý jumystaryn aǵymdaǵy jyldyń qarasha aıynyń sońyna deıin aıaqtaýdy josparlap otyrmyz. Sondaı-aq Momyshuly kóshesinde joldyń joǵarǵy qurylymyn salýǵa kiristik. Búgingi tańda 1600-ge jýyq temirbeton shpal men 600 pogondyq metr rels tóseldi. Tóle bıdegi jumystarǵa keletin bolsaq, olardy qarasha aıynyń sońyna deıin aıaqtaýdy josparlap otyrmyz. Jalpy jobany kelesi jyldyń jeltoqsanynda bitirýdi kózdep otyrmyz, — dedi Oljas Shabdanov.
Sesıada jelini odan ári damytý josparlary da aıtyldy. Basqarma basshysynyń aıtýynsha, LRT-niń ekinshi kezeńi aıasynda Tóle bı kóshesi boıymen «Barlyq» bazaryna deıin uzartý josparlanýda.