Almatylyqtarǵa mindetti áleýmettik medısınalyq saqtandyrý aıasynda kórsetilgen qyzmet úshin qalanyń medısınalyq uıymdaryna osy jyldyń qazan aıyna deıin 130,3 mlrd teńge tólendi. Bul — 211,8 mlrd teńgelik jyldyq búdjettiń 62%-ǵa jýyǵy, dep habarlaıdy infohub.kz saıty.
Áleýmettik medısınalyq saqtandyrý qorynyń Almaty fılıalynyń dereginshe, tólemniń basym bóligi stasıonarlyq emdeýge jumsaldy — 74,2 mlrd teńgeden astam. Taǵy shamamen 5,8 mlrd teńge kúndizgi stasıonar qyzmetin óteýge baǵyttaldy.
Basqa baǵyttar boıynsha da aıtarlyqtaı qarjy ıgerildi: konsýltasıa men dıagnostıka — 22,2 mlrd teńge, ońaltý — 5,1 mlrd teńge, joǵary tehnologıalyq medısınalyq kómek — rekordtyq 16,8 mlrd teńge.
Qordyń Almaty fılıalynyń dırektory İlıas Muhamedjan MÁMS júıesiniń arqasynda qala turǵyndary jyl saıyn qymbat turatyndardy qosa alǵanda, hırýrgıalyq aralasýdyń túrli túrine qol jetkizip otyrǵanyn atap ótti. Onyń aıtýynsha, mundaı otalar kúrdeliligine qaraı emhanalarda da, ǵylymı ortalyqtarda da jasalady.
«Aıta keteıik, qymbat otalar týraly aıtsaq, saqtandyrylmaǵan adamǵa olar birneshe mıllıon teńgege shyǵýy múmkin jáne jarna men aýdarym mólsherine táýeldi emes. Mine, MÁMS júıesiniń áleýmettik baǵyttylyǵy osy bolsa kerek», — dedi İlıas Muhamedjan.
Eń qymbat aralasýlardyń úshtigine mynalar endi: ımplantasıalanatyn qosalqy júrek júıesin ornatý — 80,2 mln teńge (2025 jyly bir ota jasalsa, 2026 jyldyń 8 aıynda olardyń sany 14-ke jetti); alogendi gemopoetıkalyq baǵanaly jasýshalardy transplantasıalaý — 17,5 mln teńge; mıtraldi klapandy klıpteý — 17,4 mln teńge (2025 jyly eki prosedýra, 2026 jyldyń 8 aıynda 19).
Kardıohırýrgıalyq otalarǵa 19,9 mlrd teńge baǵyttalyp, 7 367 aralasý jasaldy. Mundaı bir otanyń ortasha quny shamamen 3 mln teńgege baǵalanady.
Sonymen qatar qalada 5,6 mlrd teńgege 3 167 neırohırýrgıalyq ota, sondaı-aq jalpy quny 5,3 mlrd teńge bolatyn jambas jáne tize býyndaryn almastyrý boıynsha 3 368 ota jasaldy. Tizimge 4,6 mlrd teńgege 3 558 tamyrlyq jáne neırotamyrlyq aralasý men 303,5 mln teńgege baýyr, búırek jáne júrek transplantasıasy boıynsha 54 ota endi.