2026 jyldyń basynan beri Almatyda masań kúıde jasalǵan 224 qylmys tirkeldi, onyń 97-si aýyr dene jaraqatyn keltirýmen baılanysty, dep habarlaıdy infohub.kz.
Osyǵan baılanysty polısıa аlkogól ónimin satatyn saýda nysandarynyń ıeleri men satýshylarymen profılaktıkalyq jumysty kúsheıtti. Dúken qyzmetkerlerine ishimdik satý erejeleri men zańnamany buzǵany úshin jaýapkershilik eskertilýde.
Kezekti kezdesý Almaty polısıa departamentiniń profılaktıkalyq jumysty úılestirý basqarmasy men Almaly aýdany polısıa basqarmasynyń qyzmetkerleriniń qatysýymen ótti.
Almaty qalalyq polısıa departamentiniń profılaktıkalyq jumysty úılestirý basqarmasynyń bastyǵy Jandos Qavlıev profılaktıka polısıa qyzmetiniń negizgi baǵyttarynyń biri bolyp qala beretinin atap ótti.
«Bizdiń mindetimiz — saldaryna ǵana áreket etý emes, sebepteriniń aldyn alý. Sondyqtan аlkogól ónimin satatyn saýda sýbektilerimen profılaktıkalyq jumys polısıa qyzmetiniń mańyzdy baǵyttarynyń biri bolyp qala beredi», — dedi Jandos Qavlıev.
Polısıa qala turǵyndaryn аlkogóldi tutynýǵa jaýapkershilikpen qaraýǵa jáne yqtımal saldardy eskerýge shaqyrady.
Buǵan deıin Qazaqstan аlkogól tutyný deńgeıi boıynsha Ortalyq Azıa elderi arasynda birinshi oryn alǵany habarlanǵan bolatyn. Dúnıejúzilik densaýlyq saqtaý uıymynyń derekterine negizdelgen World Population Review reıtıńisine sáıkes, 15 jastan asqan árbir turǵynǵa jylyna 5,4 lıtr taza spırt keledi. Bir jyl ishinde kórsetkish 6,38 lıtrden tómendep, Qazaqstan álemde 68-shi orynnan 83-shi orynǵa tústi.