Almatyda Medeýbekova kóshesiniń Abaı men Raıymbek dańǵyldary aralyǵyndaǵy bóligin qaıta jańǵyrtý josparlanyp otyr: júris bóligi tórt jolaqqa deıin keńeıtilip, jaıaý júrginshi joldary, velojoldar jáne kóshe jaryǵy paıda bolady, dep habarlaıdy infohub.kz saıty.
Joba týraly qalalyq máslıhat otyrysynda jol ınfraqurylymyn damytý basqarmasynyń basshysy Oljas Shabdanov aıtyp berdi.
«Medeýbekova kóshesin Abaı dańǵylynan Raıymbek dańǵylyna deıingi jalpy uzyndyǵy 3,3 shaqyrym ýchaskede qaıta jańǵyrtý jobasy júris bóligin tórt jolaqqa deıin keńeıtýdi kózdeıdi. Sondaı-aq jaıaý júrginshi joldary men velojoldar, kóshe syrtqy jaryǵy, sondaı-aq jol qozǵalysyn uıymdastyrýdyń zamanaýı quraldary qarastyrylǵan», — dedi Oljas Shabdanov.
Onyń aıtýynsha, qoǵamdyq kólikke arnalǵan bólek jolaq múmkindigi kóliktik modeldeý barysynda qaralady.
«Bul kósheni keńeıtý Abaı dańǵylymen jáne Tóle bı men Jubanov kósheleriniń salynyp jatqan jalǵastarymen magıstraldik baılanys qurýǵa múmkindik beredi. Rysqulov dańǵylyna deıin uzartý ázirge josparlanbaı otyr», — dep qosty ol.
Almaty ákimi Darhan Satybaldy bul ýchaske buryn oblys qaramaǵynda bolǵanyn atap ótti.
«Biz joldy qalaǵa berýdi suradyq, ony keńeıtý men kútip ustaýdy óz betimizshe qarjylandyramyz», — dedi ol.
Ol Abaı men Rysqulov dańǵyldarynyń, Tlendıev pen Saıyn kósheleriniń jalǵastarynda da osyndaı jaǵdaı qalyptasqanyn qosty.
«Biz shekaraǵa deıin jetkizip jatyrmyz, shekaradan ári jumys júrgizilmeıdi. Biz de bul ýchaskelerdi ózimizge aldyq, BAQAD-qa deıin jetkizip, qalalyq búdjet esebinen aıaqtaımyz, óıtkeni olar eń aldymen qalaǵa qajet», — dep túıindedi ol.