Almatyda metropolıten, jol jelisi jáne qoǵamdyq kólik damyp keledi: 2026 jyldyń sońyna deıin qala bıligi «Qalqaman» atty jańa metro stansıasyn ashýdy josparlap otyr, al keleshekte «Jibek joly» stansıasyn áýejaımen baılanystyrmaq. Bul týraly infohub.kz saıty habarlaıdy.
Almaty qalasynyń ekonomıka jáne qarjy basqarmasynyń basshysy Baýyrjan Qudaıbergenovtyń túsindirýinshe, «Qalqaman» stansıasy metronyń jańa tarmaǵynyń bóligi bolady. Bıyl «Qalqamannan» «Barlyq» stansıasyna deıingi ýchaskeniń qurylysy bastaldy.
«Metro jelisin odan ári keńeıtý úshin «Jibek joly» stansıasynan áýejaıǵa deıingi ekinshi jeliniń jobalaý-smetalyq qujattamasy ázirlenedi», — dedi Qudaıbergenov máslıhat otyrysynda.
Jol qurylysy da jalǵasady. Josparda Rysqulov dańǵylyn qala shekarasyna deıin uzartý bar. Sondaı-aq Muqanov kóshesin Gogolden Raıymbek dańǵylyna deıin uzartady. Raıymbek dańǵylyn Shyǵys aınalma avtomobıl jolyna (SHAAJ) deıin uzartý kózdelgen.
Jyl sońyna deıin Aqjar jáne Terekti shaǵyn aýdandaryndaǵy joldardyń qurylysy aıaqtalýy tıis. «Batys qaqpa» polıortalyǵynda da jańa joldar men ınjenerlik jeliler paıda bolady.
«Qosymsha qarajat qoǵamdyq kólikti — avtobýs tasymaly men metropolıtendi sýbsıdıalaýǵa da qarastyrylǵan», — dep qorytyndylady qala ákimdiginde.
Buǵan deıin «Kýrsıv» «Almatymetrokurylys» kompanıasy 2025 jyldyń qorytyndysy boıynsha 866,9 mln teńge shyǵynǵa ushyraǵanyn jazǵan. Sonymen qatar, túrli sot isteri boıynsha kompanıa merdigerlerge 500 mln teńgeden astam qaryz, al olardyń aldyndaǵy jalpy qaryzy 2,3 mlrd teńgeden asady.