Almaty ákimdigi qala turǵyndaryn Naýryzbaı batyr kóshesindegi qozǵalystyń jańa sulbasy týraly eskertti. Ol 1 tamyzdan bastap kúshine enedi, dep habarlaıdy infohub.kz saıty.
Almaty ákimdiginiń baspasóz qyzmetiniń málimetinshe, megapolıste jol júrisin uıymdastyrýdy jetildirý jalǵasýda. 1 tamyzdan bastap Naýryzbaı batyr kóshesiniń Raıymbek dańǵylynan Abaı dańǵylyna deıingi bóliginde jańa qozǵalys sulbasy engiziledi. Ol jeke velosıped ınfraqurylymyn qurýdy kózdeıdi.
«Júrgiziletin jumystar aıasynda marshrýttyq kólik quraldaryna arnalǵan bólek jolaq alynyp tastalady. Avtobýs baǵyttary Jeltoqsan kóshesine aýystyrylady, bul Naýryzbaı batyr kóshesinde velojol uıymdastyrýǵa múmkindik beredi», — delingen habarlamada.
Ózgerister velosıpedshilerdiń qaýipsizdigin arttyrýǵa, qalalyq veloınfraqurylymdy damytýǵa jáne kólik aǵyndaryn tıimdi bólýge baǵyttalǵany atap ótildi.
Júrgizýshiler men jol qozǵalysynyń basqa da qatysýshylary aldaǵy ózgeristerdi aldyn ala eskerip, marshrýttardy jańa sulbaǵa sáıkes josparlaýǵa jáne jol belgileri men syzyqshalarynyń talaptaryn saqtaýǵa shaqyrylady.